Сеул шаҳри прокуратураси КХДРга ўтишга уринган Жанубий Корея фуқаросига айблов эълон қилди, деб хабар қилмоқда Ёнхап агентлиги.

Терговчиларнинг фикрича, у хавфсизлик тўғрисидаги миллий қонун талабларини бузган. Унга мувофиқ, мамлакат фуқаролари ҳукумат рухсатисиз шимолий кореяликлар билан алоқа ўрната олмайди. Бундан ташқари, КХДРга фойда келтирадиган хатти-ҳаракатларни содир этишга ҳақлари йўқ.

Тергов маълумотларига кўра, 54 ёшли эркак 2013 йил сентябрь ойида Хитойга бориб, у ердан Шимолий Кореяга ўтишга муваффақиятсиз уринган. Бир ой ўтгач, у КХДРнинг Пекиндаги элчихонасига мурожаат қилган. Бироқ, унга рад жавоби берилган. 

Маълумотларга кўра, у 2012 йили Жанубий Кореяда бўлиб ўтган президентлик сайловларидаги қонунбузарликларни КХДР ОАВга хабар қилмоқчи бўлган.