Яқинда хориж телеканалларидан бири орқали ахборот дастурини томоша қилаётган эдим, кичик қизим, “Дада, қаранг, Ўзбекистон байроғини кўрсатишаяпти”, деди. Хақиқатан, ҳам қандайдир анжуман муносабати билан Нью-Йоркдаги БМТ қароргоҳи кўрсатилаётган эди. Шунда тенглар ичра тенг Ўзбеккистоннинг байроғи яққол кўзга ташланди. Биринчидан, ўқувчи қизимнинг мамлакатимиз байроғига бўлган эҳтироми, иккинчидан мустақил юртимизнинг байроғи юксак қароргоҳда ҳилпираб туриши кўнглимни тоғдек кўтариб, “кеча ким эдигу, бугун ким бўлдик”, деган саволни ўз-ўзимга бериб, қалбимда ўзгача ғурур ва ифтихор жўш урди.

Ким эдигу, ким бўлдик?

Хақиқатан ҳам, 25 йил аввал ким эдик? Қизил империя матбуотида, телевидениесида халқимиз мунтазам равишда таҳқирланаётган, камситилаётган, боқиманда тамғаси ёпиштирилаётган даврлар ёдимиздан кўтарилгани йўқ. Ўшанда “мустақил бўлсанг, узоққа бормайсан, ўз кунингни ўзинг кўролмайсан”, дейилмаганмиди? Мана, мустақил бўлганимизга 25 йил бўлди. Мустақиллигимизнинг ҳар бир йили Ватанимиз солномасига ёрқин саҳифа бўлиб кирди. Ўтган йиллар давомида халқимиз мустақилликнинг нақадар азиз неъмат эканини англаб етди ва истиқлолни кўз қорачиғидек асраш зарурлигини чуқурроқ ҳис этди.
Жонажон Ўзбекистоннинг бугунги жамолини ўтмишига қиёслаб бўлмайди. Истиқлол йилларида мамлакатимиз иқтисодиёти жадал ривожланиб, халқимиз турмуш фаровонлиги юксалди. Буларни авваллари тассаввур қилишнинг имкони хам йўқ эди. Энг асосийси, мустақиллик йилларида халқимиз дунёқараши, онгу тафаккури ўзгарди. Теварак-атрофга, меҳнатга, ҳаётга бошқача муносабатда бўла бошладик.

Бу кунларга етганлар бор...

Биргина мисол, авваллари Ҳиндистон пойтахти Дехлига бормоқчи бўлсак, аввал Москвага бориб, у ердан самолётда яна Тошкентга келиб, сўнг Деҳлига училарди. Эндиликда “Ўзбекистон ҳаво йўллари” авиакомпанияси самолётлари дунёнинг барча йирик шаҳарларига тўғридан тўғри парвоз қилмоқда. Авикакомпания парки замонавий самолётлар билан тўлдирилган ва бу жараён давом этмоқда. Иқтисодиётнинг қон томири бўлмиш темир йўл тизимида хам асрларга татигуйлик ишлар қилинди. Истиқлол йилларида Қамчиқ довонида улкан бунёдкорлик ишлари амалга оширилди. Довон ошиб ўтадиган автомобиль йўли реконструкция қилинди, умумий узунлиги 1,5 километр бўлган иккита туннел қурилди. Довондан ўтишда ҳам вақт, ҳам хавфсизлик нуқтаи назаридан катта имкониятлар яратилди. Оралдан кўп ўтмай Қамчиқ довони орқали ўтадиган автомобиль йўли ёнидан темир йўл қуриш режалаштирилди. Бунинг учун узоқ масофали, яъни 19,2 километрлик туннел барпо этиш тақоза этиларди. 2016 йилнинг 22 июни мамлакатимиз, қолаверса, бутун минтақамиз тарихида ўчмас, том маънодаги тарихий кун сифатида мангуга муҳрланди. Шу куни 123,1 километрлик Ангрен-Поп темир йўли ва унинг таркибидаги 19,2 километрлик туннел қурилиши ниҳоясига етиб, ишга туширилди. Халқимизнинг фидокорона меҳнати улкан бунёдкорлик салоҳиятининг амалий намойиши бўлмоқда. Замонавий уйларда истиқомат қилаётган халқимиз вакилларининг ўзимизда ишлаб чиқарилаётган автомобилларни бошқараётгани хам кўнгилларимизни тоғдек кўтармоқда.

Халқимиз ўзининг қадрини билди. Ал Хоразмий, Ал-Фарғоний, Ал Беруний, Ибн Сино, Мирзо Улуғбек каби буюк зотларнинг, Амир Темур сингари буюк давлат арбобларининг авлоди эканимизни, тарихда ҳеч кимдан кам бўлмаганимизни ва келажакда ҳам кам бўлмаслигимизни тўла англаб етдик. Шу ўринда, хориж дипломатларидан бирининг “Ўзбекистон – пойтахт шаҳарлар мамлакати”, деган сўзларида жон бордек. Дипломатнинг айтишича, тарихда бизнинг халқчалик ҳеч бир халқ буюк давлатлар тузмаган экан. Мамлакатимизнинг барча йирик шаҳарлари қадимда у ёки бу мамлакатнинг пойтахти бўлганини эслаб ўтишнинг ўзи кифоя. Шу ўринда Ўзбекистон давлат мадҳиясидаги “Улуғ халқ қудрати жўш урган замон, оламни маҳлиё айлаган диёр”, деган сатрлар бир-бир хаёлимиздан ўтади.

“Гўзал ва бетакроримсан, муқаддас Ватаним, жоним сенга фидо, Ўзбекистоним!”
Эркин ва фаровон ҳаётимиз ғурур-ифтихоримиз тимсолига айланди. Буларнинг барчаси истиқлол шарофати, Президентимиз юритаётган оқилона сиёсат самарасидир. Тинчлик барқарор бўлган жойда тараққиёт бўлади. Халқимиз эришаётган бундай ютуқлар, ҳаётимиздаги юксалиш, мамлакатимизда ҳукм сураётган тинчлик ва осойишталик мевасидир. Президентимиз таъбири билан айтганда, Ўзбекистонимиз мустақил тараққиёт йўлида қандай улкан, бошқаларнинг ҳавасини тортадиган ютуқ ва марраларга эришган бўлса, буларнинг барчасининг негизи – юртимизда тинч ва осуда ҳаётни, миллатлар ва фуқаролараро тотувликни, ўзаро меҳр-оқибат ва ҳамжиҳатликни асраб-авайлаб келаётганимиздадир.

Шуларни ўйлар эканман, “Гўзал ва бетакроримсан, муқаддас Ватаним, жоним сенга фидо, Ўзбекистоним!” деган сўзларни қўрқмасдан, бемалол айтадиган кунлар келганига шукроналар айтамиз.


Шарофиддин Тўлаганов