Ko‘pchilikka yaxshi ma'lumki, «Matiz» va «Neksiya»larning kuzovi zanglashga chidamlilik darajasi unchalik ham havas qiladigan holatda emas edi. Biroq, GM-O‘zbekiston zavodidagi texnologik uskunalar to‘liq almashtirilgan yoki yangilangani tufayli, avtomobilsevarlar bu muammoni tez orada unutsalar ajab emas. Endilikda, kuzovlarni bo‘yash jarayonida «zamonaviy texnik yechimlar va komponentlardan foydalanilmoqda», - deya xabar qilmoqda Ravon matbuot xizmatiga tayangan holda Nuz.uz.
Jumladan, bo‘yash jarayonini yaxshilash imkonini beruvchi yangi amaliyotlar joriy qilingan: changdan asrash uchun maxsus tonnellar barpo etilgan, kuzov bo‘yoq sepilishidan avval tozalanadi, asosiy bo‘yash jarayoni «yuqori darajadagi avtomatlashtirilgan» holda amalga oshiriladi. Bundan tashqari, korxona matbuot xizmati kuzovga ishlov berishga oid grafikani ham taqdim etgan.
Eslatib o‘tamiz, bugungi kunda Ravon brendi ostida R2, Nexia R3, R4 va Gentra modellari ishlab chiqarilmoqda. Tez orada, mazkur modellar safi kengaytirilishi kutilayapti.
