Бокс бўйича супероғир вазн тоифасида IBO, WBA ва WBO версиялари бўйича жаҳон чемпиони ҳисобланган британиялик Тайсон Фьюри фаолиятини якунлагани ҳақида маълум қилди.

«Мен буюкман ва мен кетаяпман», — деган Фьюри Twitter саҳифаси орқали.

Шу билан бирга у бокс у иштирок этган энг азобли иш эканини таъкидлаб ўтган.

Сентябрь ойи охирида ушбу британиялик боксчининг  кокаин гиёҳванд моддасини аниқлаш бўйича топширган допинг тести ижобий натижа бергани маълум бўлганди.

Британиялик 28 ёшли боксчи 22 сентябрь куни Англиянинг Ланкестер шаҳрида текширувдан ўтганди. Унинг қон таркибида кокаин борлиги аниқланди.

Энди катта эҳтимол билан Тайсон Фьюри қўлга киритган барча чемпионлик камарларидан айрилади. 

Ўзининг профессионал фаолияти давомида Фьюри 25 жанг ўтказиб, барчасида ғалаба қозонган (18 нокаут).

Аввалроқ 29 октябрь кунига белгиланган украиналик Владимир Кличко ва Тайсон Фьюри ўртасидаги реванш жанги ташкилотчилари беллашув номаълум муддатга қолдирилганини тасдиқлаганди.

Эслатиб ўтамиз, 2015 йилнинг ноябрь ойида Тайсон Фьюри 12 раундлик жангда Владимир Кличкони ҳакамларнинг якдил қарори билан мағлубиятга учратиб, IBF, WBA ва WBO чемпионлик камарларини қўлга киритганди.

Кейинроқ британиялик боксчи мажбурий жанг ўтказишдан бош тортгани учун IBF камаридан маҳрум этилган эди.