Google компанияси Pixel смартфонлари анонсидан кейин Daydream - виртуал реаллик дубулғаси, Google Wi-Fi роутери, Chromecast Ultra ТВ-приставкаси ва Google Home'нинг финал версиясини тақдим қилди. Бу ҳақида hi-tech.mail.ru'да маълум қилинди.

Daydream

Google компанияси Daydream платформаси учун янги виртуал реаллик дубулғасини намойиш қилди. Pixel смартфони бу VR-тизимни қўлловчи илк қурилмага айланди. Дубулға нархи - тахминан 79 доллар. 

Дубулға аксарият смартфонлар учун универсал ҳисобланади. Виртуал реаллик интерфейсини махсус пульт орқали бошқариш мумкин бўлади. 

Chromecast Ultra

Chromecast ТВ-приставкаси янгиланди - унинг янги версиясида Ultra модели тақдим қилинди. Янги модель 4К-видеони қўллаб-қувватлайди, у ўзининг "ўтмишдош"идан 1,8 баробар тезроқ ишлайди ва Ethernet-уланишга эга, телевизорга HDMI орқали уланади. Баҳоси - 69 доллар. 

Google Wi-Fi

Компания янги Google Wi-Fi роутерини намойиш қилди. Уни хонадон бўйлаб Wi-Fi тўлиқ қамраб олиши учун бир неча роутердан иборат махсус массивда қўллаш мумкин. Бир қурилма қиймати - 129 доллар, уч қурилмадан иборат тўплам нархи эса - 299 доллар. 

Google Hub

Компания хонадон учун "ақлли" қурилманинг финал версиясини намойиш қилди. Hub'га Google Assistant овозли ассистенти ўрнатилди, у билан деярли тирик одамдек мулоқот қилиш мумкин бўлади. Ёрдамчидан таом рецепти, гапни таржима қилиш, чироқни ёки мусиқани ёқиш ва бошқа кўплаб нарсаларни бемалол сўрайверасиз. Масалан, унга "Хайрли кун" десангиз, у сизга вақт, об-ҳаво, йўлларнинг тирбандлиги ҳақидаги маълумотларни етказади. Google Hub буйруқ контекстини инобатга олади.

Уйда бирйўла бир неча Google Hub ўрнатиш мумкин, шунда истаган хонада ёрдамчи билан мулоқотга киришаверасиз. У компаниянинг бошқа қурилмалари ва сервислари билан боғланган, лекин бошқа компаниялар ҳам ўз дастурларини унга киритишлари мумкин. Масалан, агар сизда Chromecast бўлса, у ҳолда Hub ёрдамида телевизор ёки акустикани бошқариш мумкин бўлади - мусиқани ёқиш, YouTube'да видео, фильмлар, сериаллар кўриш. Бир Google Hub нархи - 129 доллар.