Sleeping in Airports ихтисослашган портали дунёнинг энг яхши аэропортини аниқлаш мақсадида турли мамлакатлар сайёҳлари орасида сўровнома ўтказди. Натижаларга кўра, ғолиб - Сингапурнинг Чанги аэропорти, деб эълон қилинди. 

Манбага кўра, сайёҳлар овоз бериш жараёнида аэропортнинг дам олиш ҳудудидаги қулайликлар, хизмат кўрсатиш даражаси, кўнгилочар иншоотлари ва овқатланиш жойларининг мавжудлиги, шунингдек хавфсизлик, тозалик каби жиҳатларига асосланишган. 

Сайёҳлар ходимларининг хизмат кўрсатиши, бепул кинотеатр, кўплаб ресторанлар ва ҳамёнбоп нархдаги дўконлари билан танилган Чанги аэропортини юқори баҳолашди. Шунингдек улар аэропортда ҳақиқий боғларнинг мавжудлиги ва терминаллардан бирининг томидаги ҳовузни ҳам эътироф этиб ўтишган. Сўровнома иштирокчилари уни ҳатто кўнгилочар паркка қиёслашди. 

Рейтингнинг иккинчи ўрнида Жанубий Кореянинг Сеул остидаги Инчхон аэропорти номи қайд этилди. Учликни Токиодаги Ханэда аэропорти якунлайди. Рўйхатнинг тўртинчи ва бешинчи поғоналарини Тайваннинг Таоюань ҳамда Мюнхеннинг Франца-Йозефа Штраус номли аэропорти эгаллади. 

Ўнликдан шунингдек Япониянинг Осака шаҳри яқинидаги Кансай аэропорти, Ванкувер ва Хельсинки-Вантаа халқаро аэропортлари ҳамда Таллиндаги Леннарт Мери номидаги аэропорт ўрин олган. Энг яхши аэропортлар ўнлигига Цюрих аэропорти якун ясайди.