Ispaniya hukumati Kataloniya korridalarni taqiqlashga haqsizligini ma'lum qildi

Ispaniya konstitutsiyaviy sudi 20 oktabr kuni Kataloniya hukumati ushbu muxtor hududda korridalar o‘tkazishni taqiqlashga hech qanday haqqi yo‘qligini rasmiy ma'lum qildi. Uning ma'lum qilishicha, Kataloniya hukumati ushbu o‘yinlarni tartibga solishi mumkin xolos. Bu haqda RIA “Novosti” xabar bermoqda.

Sudning fikricha, ushbu huquq muxtor jamoatchilik zimmasiga kirmaydi, bu bilan markaziy hukumat shug‘ullanishi lozim.

Shunga muvofiq, konstitutsiyaviy sud 2010 yilning 28 iyul kuni Kataloniya parlamenti tomonidan qabul qilingan muxtoriyat hududida korridalar o‘tkazishni taqiqlash borasidagi qonunni bekor qildi. Ushbu qonun 2012 yilning 1 yanvaridan kuchga kirgan edi. 2012 yilning 28 oktabr kuni Ispaniyadagi hukmron Xalq partiyasi mazkur qonun yuzasidan mamlakat konstitutsiyaviy sudiga da'vo kiritgan edi. Partiyaning fikricha, mazkur qonun “Konstitutsiyaning beshta moddasi buzilishiga” sabab bo‘ladi.

Sakkiz nafar sudya yoqlab chiqqan (uch nafari qarshi chiqqan) mazkur sud jarayonida Kataloniya hukumati korridalarni tamomila bekor qilish emas, aksincha, uni o‘tkazishni tartibga solish vakolatiga ega ekanligi aytildi.