Эрон ядро дастури билан боғлиқ муаммоларнинг ҳал этилиши билан расмий Теҳроннинг Шанхай ҳамкорлик ташкилотига аъзо бўлиши учун мавжуд тўсиқлар қолмаган. Россиянинг БМТдаги доимий вакили Виталий Чуркин шундай баёнот берган. 

БМТ ХК 28 октябрь куни БМТнинг минтақавий ташкилотлар ҳисобланувчи — МДҲ, ШҲТ ва Коллектив хавфсизлик шартномаси ташкилоти (КХШТ) кабилар билан ўзаро ҳамкорлиги борасида очиқ мажлис бўлиб ўтди. 

Унда ХКга раислик қилаётган Россия вакили Чуркин Эрон ШҲТда 2005 йилдан бери кузатувчи мақомида эканини билдирган. "Эрон ядро дастури атрофидаги вазият ҳал этилгани ва БМТ санкцияларининг бекор қилиниши билан унинг ташкилотга аъзо бўлиш борасидаги мурожаатини ижобий кўриб чиқиш учун бирон тўсиқ қолмади, деб ҳисоблаймиз", — деган Россия доимий вакили. 

Чуркиннинг таъкидлашича, ШҲТнинг 15 йиллик тарихида унинг минтақавий жараёнларга таъсири сезиларли кучайган. 

"Ҳиндистон ва Покистоннинг ташкилотга тенг ҳуқуқли аъзо бўлиш жараёни сўнгги босқичга кирди. Ўйлаймизки, уларнинг ШҲТда иштироки бу ташкилотдаги ҳамкорликни бойитади", — деган Чуркин.

Бугунги кунда, Ўзбекистон, Россия, Хитой, Қозоғистон, Тожикистон ва Қирғизистон ШҲТнинг тенг ҳуқуқли аъзолари ҳисобланади. Белоруссия, Мўғулистон, Ҳиндистон, Эрон, Покистон ва Афғонистон кузатувчи мақомига эга. 2015 йили Ҳиндистон ва Покистонни ташкилотга қабул қилиш жараёни бошланган эди. 

Арманистон, Озарбойжон, Камбожа, Непал, Туркия ва Шри-Ланка мулоқот бўйича ҳамкор давлатлар ҳисобланади.