Churkin: Eronning ShHTga a'zo bo‘lishiga to‘siqlar qolmadi

Eron yadro dasturi bilan bog‘liq muammolarning hal etilishi bilan rasmiy Tehronning Shanxay hamkorlik tashkilotiga a'zo bo‘lishi uchun mavjud to‘siqlar qolmagan. Rossiyaning BMTdagi doimiy vakili Vitaliy Churkin shunday bayonot bergan. 

BMT XK 28 oktabr kuni BMTning mintaqaviy tashkilotlar hisoblanuvchi — MDH, ShHT va Kollektiv xavfsizlik shartnomasi tashkiloti (KXShT) kabilar bilan o‘zaro hamkorligi borasida ochiq majlis bo‘lib o‘tdi. 

Unda XKga raislik qilayotgan Rossiya vakili Churkin Eron ShHTda 2005 yildan beri kuzatuvchi maqomida ekanini bildirgan. "Eron yadro dasturi atrofidagi vaziyat hal etilgani va BMT sanksiyalarining bekor qilinishi bilan uning tashkilotga a'zo bo‘lish borasidagi murojaatini ijobiy ko‘rib chiqish uchun biron to‘siq qolmadi, deb hisoblaymiz", — degan Rossiya doimiy vakili. 

Churkinning ta'kidlashicha, ShHTning 15 yillik tarixida uning mintaqaviy jarayonlarga ta'siri sezilarli kuchaygan. 

"Hindiston va Pokistonning tashkilotga teng huquqli a'zo bo‘lish jarayoni so‘nggi bosqichga kirdi. O‘ylaymizki, ularning ShHTda ishtiroki bu tashkilotdagi hamkorlikni boyitadi", — degan Churkin.

Bugungi kunda, O‘zbekiston, Rossiya, Xitoy, Qozog‘iston, Tojikiston va Qirg‘iziston ShHTning teng huquqli a'zolari hisoblanadi. Belorussiya, Mo‘g‘uliston, Hindiston, Eron, Pokiston va Afg‘oniston kuzatuvchi maqomiga ega. 2015 yili Hindiston va Pokistonni tashkilotga qabul qilish jarayoni boshlangan edi. 

Armaniston, Ozarboyjon, Kamboja, Nepal, Turkiya va Shri-Lanka muloqot bo‘yicha hamkor davlatlar hisoblanadi.