АҚШнинг сайланган президенти Дональд Трампнинг қизи Иванка билан учрашув имконини сотиб олмоқчи бўлган онлайн-аукцион иштирокчилари лот учун эълон қилинган маблағнинг ярмисини тўлашга тайёр.

"Иванка Трамп билан Нью-Йорк ёки Вашингтонда кофедан лаззат ол" номи остидаги лот CharityBuzz.com сайтига қўйилган. Уни сотишдан тушадиган маблағ 50 минг доллар атрофида бўлиши мумкин, бироқ ҳозирча энг катта таклиф 24 мингни ташкил қилди. 5-13 декабрь кунларида эса ҳаммаси бўлиб 15 та таклиф берилган.

Энг кўп маблағни таклиф этган иштирокчи Нью-Йоркдаги Trump Tower ёки Вашингтондаги Trump International меҳмонхонасида 30-45 дақиқалик учрашув имконига эга бўлади. Шуниси диққатга сазоворки, ғолиб нафақат шахсий маълумотлари ҳақидаги махсус анкетани тўлдириши, балки Trump Organization компанияси томонидан тасдиқланиши ҳам лозим.