Германиянинг жануби-ғарбидаги Эринген шаҳрида жойлашган масжидга аксилислом ҳужуми уюштирилди. Номаълум кишилар Турк масжиди (Масжийд-ут-туркий) олдида чўчқа калласини ташлаб кетишган. Эртаси куни эрталаб ўғлини масжиддаги Қуръонни ўрганиш сабоқларига олиб келган киши бу ерда чўчқанинг калласини кўриб қолади. Бу ҳақида Туркиянинг Daily Sabah нашри хабар берди

Масжид воқеа юзасидан шикоят ёзиб, керакли идорага мурожаат қилган бўлса-да, жиноятчининг қўлга олинишига умид кам. Полиция вакили Райнер Оттнинг маълум қилишича, мазкур иш юзасидан ҳали аниқ натижага эришилмаган. 

Эрингемдаги Турк масжиди полицияга барча кузатув камералари материалларини тақдим этган, лекин иншоотни қўриқлаш учун соқчи талаб қилмаган. Оттнинг сўзларига кўра, масжидни назорат қилиш уларнинг ҳар кунги вазифалари қаторига киради. 

Эринген мэри Тило Михлер ҳам бундай ҳужумни қоралаб, полиция айбдорларни топишига умид билдирди. 

Бу масжидга уюштирилган биринчи ҳужум эмас. 2015 йилнинг августида масжиднинг олд томонига номаълум эркак томонидан "Мусулмонларга ўлим!" деб ёзиб кетилган. Бу воқеадан бир неча ҳафта ўтиб, ёвуз ниятли кимсалар масжид деворига тухумлар отиб кетишган. 

Турк масжиди жамиятнинг кўп соҳаларида фаол иш олиб боради ҳамда шаҳар ва христианлар жамияти билан муносабатларни қўллаб-қувватлайди. Эринген мусулмонлари қочқинлар учун ўз уйлари эшикларини очишган, шунингдек улар аксилислом ҳаракатларга фаол қаршилик кўрсатиб келишади.