Германиянинг Audi автомобиль ишлаб чиқарувчи компанияси барча ғилдираклари етакчи бўлган 8 миллионинчи машинасини ишлаб чиққанини эълон қилди. Бу ҳақда компания матбуот хизмати хабар қилган. 

Мексикадаги янги заводда ишлаб чиқилган қизил (Garnet Red) тусдаги Audi Q5 2.0 TFSI quattro модели ушбу машина экани айтилмоқда. 1980 йилда ҳавола қилинган quattro технологияси бугунги кунда Audi компанияси томонидан ишлаб чиқилган ёки ишлаб чиқарилаётган 100 дан ортиқ моделда қўлланилади.

Барча ғилдиракларни етакчи бўлишига жавоб берувчи quattro Audi Q7, Audi A4 allroad quattro, Audi A6 allroad quattro, Audi A8, Audi R8, S ва RS моделларининг барча намунасига ўрнатилади. Бошқаларида қўшимча имконият сифатида таклиф этилади. 

Компания маълумотларига кўра, 2015 йилда Audi мижозларининг 44 фоизи айни технология қўлланилган автомобилларни маъқул кўрган. Бунда биринчи ўрин Audi Q5 моделига тегишлидир. Ундан жами 262 000 дона сотилган. АҚШ, Канада, Россия ва Яқин шарқ мамлакатларида quattro моделларига қизиқиш катта. 

Audi – Volkswagen Group таркибига кирувчи компания бўлиб, унга 1932 йилда асос солинган. Ҳозирда, компания бош қароргоҳи Германиянинг Ингольштадт шаҳрида жойлашган.