Интернет фойдаланувчилари АҚШ президенти Дональд Трамп инаугурацияси тасвирланган видеоёзувда ғайритабиий ҳолатга гувоҳ бўлишди. Тадбир CNN телеканали томонидан трансляция қилинган.

Бир қатор фойдаланувчиларнинг фикрича, Вашингтон марказидаги Пенсильвания-авеню бўйлаб сайр қилган Трамп ҳамда унинг рафиқаси кетидан юрган тан соқчида сунъий қўл бўлган. Унинг ортида эса аслида қурол яширинган бўлган. Бу фавқулодда ҳолатда керак бўлиб қолиши мумкин. Тахминлардан бирига кўра, агентнинг ҳақиқий бармоқлари бу пайт пальто остидаги тўппонча ёки мини-автомат тепкисида бўлган.

Видео ва фотосуратларда сочи йўқ тан соқчи узоқ муддат давомида бир хил вазиятда тургани ҳамда ҳаракатланмаганини кўриш мумкин. Бу эса унинг қўлларидан бири сохта экани ҳақидаги миш-мишларни келтириб чиқарди.

Ғарб ОАВнинг таъкидлашича, ўша пайтдаги вазият ва Америка пойтахтидаги норозилик намойишларини ҳисобга олса, қўриқчилардан бири матбуот эътиборини айниқса кўп тортгани табиий ҳолат.

Бироқ тақдим этилган кадрлардан бирида агент барибир ўз қўли ҳолатини ўзгартириб, бармоқларини қайириб олганини кўриш мумкин. Бу эса унинг қўли ҳақиқий эканидан далолат беради.