Тошкент аэропортида юклари орасида патронлар бор бўлган шахс қўлга олинди. Исроилдаги IzRus порталида хабар қилинишича, у Исроил мудофаа армияси – САХАЛда аскарлик муддатини якунлаб, Таиландга дам олишга кетаётган исроиллик аскар бўлган.

Тошкентдан транзит орқали учмоқчи бўлган бу собиқ аскарнинг юклари самолётга ўтириши арафасида текширилганда ундан 13та ўқ топилган.

У айни вақтда Тошкент аэропортининг вақтинчалик сақлаш изоляторида сақланмоқда. Исроилнинг Ўзбекистондаги консули қўлга олинган фуқаро ҳолидан хабар олган. 

Воқеа юзасидан суруштирув ишлари олиб борилмоқда.

«Исроил ТИВ ҳибсга олинган аскарга ёрдам кўрсатишга уринмоқда», дейилган хабарда.