Япониянинг Nissan компанияси X-Trail кроссоверининг махсус намунасини тақдим этди. Унинг тўпламига дрон ҳам қўшилди. Фирма X-Scape нусхасидан жами 1200 дона ишлаб чиқаради. Уларнинг ҳар бирига кўтариб юриш учун махсус сумкали Parrot Bebop 2 квадрокоптери тақдим этилади. 

Ихчам дронга Nissan тимсоли туширилган бўлиб, 500 гр келади ва Follow me (Менга эргаш) функциясига эга. У Android ва iOS дастурий таъминотида ишловчи илова ёрдамида ишга туширилади. Тўпламга, шунингдек, Parrot Skycontroller 2 масофадан бошқариш пульти ҳамда Parrot Cockpit Glasses видеокўзойнаги киради. 

Кўзойнакда дроннинг 14 мегапикселли камераси олаётган тасвирларни бевосита кўриш мумкин. Дрон, шунингдек, камерани рақамли барқарорлаштирувчи билан жиҳозланган. У кўпи билан 25 дақиқа парвоз қила олади. 

Nissan X-Trail X-Scape 130 от кучига эга, 1,6 литр ҳажмдаги дизель мотор ҳамда Tekna тўпламига кирувчи барча жиҳозлар билан бирга ишлаб чиқилади. 

Махсус автомобиллар Ғарбий Европа мамлакатларида беш ва етти ўриндиқли намунада тақдим этилади. Ҳозирча, унинг нархи ва сотишга чиқарилиш муддати хусусида маълумотлар йўқ.