Германиянинг Audi компанияси купесифат кроссоверининг концептини намойиш қилди. E-Tron Concept Sportback деб номланган автомобиль келаси ҳафта ўрталарида Шанхай автокўргазмасида намойиш қилинади. 

Машина ёритқичларининг кўриниши ва радиатор қафасининг дизайни икки йил муқаддам Франкфуртда намойиш қилинган e-tron quattro прототипини ёдга солади. Эҳтимол, кроссовер ҳам ўша машина каби электр мотор билан жиҳозланар. Бироқ, ҳозирча, бу хусусда маълумот йўқ. 

Audi e-tron quattro концепти жами 435 от кучига эга 3та электрмотор билан жиҳозланган эди. Кроссовер 4,6 сонияда соатига 100 км тезликка чиқади, унинг энг юқори тезлиги электроника воситасида соатига 210 км тезлик билан чегараланган. 

2020 йили Audi қаторида 3та электрокар пайдо бўлиши кутилмоқда. Уларга Tesla Model X билан рақобат қиладиган ўрта ўлчамли кроссовер, A9 седани ва шаҳарларга мослашган компакт-кар киради. Ихчам автомобиль бир марта қувватлангач, 450 км масофани босиб ўтади. 

Audi компанияси электрокарлари ва гибрид автомобилларини Хитойда ишлаб чиқаради. 2017 йил январь ойида FAW компанияси билан шундай келишув имзоланган эди.