Маълумки, 12 майдан дунёнинг кўплаб давлатларида компьютерларнинг “WannaCry” ва унинг такомиллаштирилган кўринишидаги тамагир вируслар билан зарарланиш ҳолатлари кузатилди. Вируснинг ишлаш моҳияти шундан иборатки, у Windows дастурий таъминотининг янгиланишларидан компьютер тизимига кириб олади ва ундаги барча файллар ҳамда маълумотларни блоклайди. Мазкур блоклашни бекор қилиш учун эса, хакерлар гуруҳи қисқа муддат ичида 300 биткоин миқдорида товон пули тўлашни талаб қилишади. 

2017 йил 17 май куни Халқаро Пресс-клубнинг навбатдаги сессиясида шу каби тамагир вирусларнинг Ўзбекистондаги компьютерларга нақадар салбий таъсир этгани ёки давлат идоралари компьютерларининг неча фоизи вирус билан зарарлангани ёхуд йўқлигига ойдинлик киритилди.  

Ошкоралик тамойилида бўлиб ўтган учрашувда иштирок этган Ўзбекистон Ахборот технологиялари ва коммуникацияларини ривожлантириш вазири Шерзод Шерматовнинг сўзларига кўра, қанчалик афсусланарли бўлмасин, Ўзбекистондаги аксар компютерларда Windows дастурий таъминотларининг ноқонуний нусхаларидан фойдаланилиши ва уларнинг интернет орқали янгиланиб турилмаслиги ғаразли вирус тарқалишининг олдини олган.