Nokia ва Apple компаниялари патент ҳуқуқлари бузилгани хусусидаги суд тортишувларига чек қўйиш ва ўзаро ҳамкорлик тўғрисидаги келишувни имзолади. Бу ҳақда Финландия компанияси матбуот хизмати ахборотида сўз юритилган. 

Ҳужжатга мувофиқ, Nokia Apple компаниясига бир неча маҳсулотини тақдим этади ва тармоқ инфратузилмалари хизматини кўрсатади. Шу билан бирга, компаниялар саломатлик учун электрон маҳсулотлар ишлаб чиқишда ҳамкорлик қилиш борасида имкониятларни қидиради. 

Аммо, келишув шартлари ва қийматига ойдинлик киритилмаган. 

Эслатиб ўтамиз, 2016 йил 22 декабрда Nokia компанияси Apple устидан Германия ва АҚШнинг бир неча судларига патент даъволари билан мурожаат қилгани ҳақида хабарлар пайдо бўлганди. 

«Nokia компанияси бизнинг узоқ муддатли инвестицияларимиз ва ишланмаларимиз туфайли бугунги кунда замонавий мобил қурилмалар, хусусан, Apple қурилмаларида фойдаланиладиган технологиялар ишлаб чиқилди», — деган эди Nokia патент департаменти раҳбари Илкка Рахнасто. 

Apple, ўз навбатида, Финландия компаниясини «патент троллари» билан тил бириктирганликда айблади. Apple вакили сўзларига кўра, Nokia адолатли таклиф асосида ўз патентларига лицензияларни беришдан бош тортган, энди эса, Apple компаниясидан пул ундирмоқчи.