Евроиттифоқ раҳбари Дональд Туск Буюк Британиянинг Европа Иттифоқи (ЕИ) таркибида қолиши мумкинлигига ҳали-ҳануз умид билдирмоқда. У ЕИ саммити очилиши арафасида Брюсселда бўлиб ўтган матбуот анжуманида шундай баёнот билан чиқди. 

"Британиялик баъзи дўстларим мендан Brexit бекор бўлиши мумкинми ёки йўқлиги тўғрисида сўрашади. Мен уларга айтаман - ЕИ имконсиздек туюлган орзулар устига қурилган. Шунинг учун - ким билади дейсиз? Мени хаёлпараст дейиш мумкин, лекин биргина мен бундай эмасман", - дейди у. 

Тускнинг сўзларига кўра, Буюк Британиянинг ЕИ таркибидан чиқиши - "энг мураккаб жараён". "Музокаралар уч кун аввал бошланди. Бу ЕИ яхши тайёргарлик кўрган энг қийин жараён", - дея таъкидлади Евроиттифоқ раҳбари. 

Лондон ва Брюссель ўртасидага расмий музокаралар 19 июнь куни Бельгия пойтахтида бошланган. У 2018 йилнинг ноябрига қадар давом этади, шундан сўнг эришилган келишувларни миллий парламентларда ратификация қилиш учун томонларга ярим йил вақт берилади.