Интернетнинг йирик ноқонуний савдо майдони ҳисобланган AlphaBay Америка махсус кучлари томонидан халқаро кибержиноятчиликка қарши кураш доирасида ўтказилган амалиёт чоғида ёпилди. Бу амалиёт президент Дональд Трампнинг бевосита кўрсатмаси асосида амалга оширилган. Reuters агентлиги мамлакат бош прокурори Жефф Сешнс сўзларига асосланган ҳолда шу ҳақда хабар қилмоқда. “AlphaBay бир йиллар муқаддам ишга туширилган бўлиб, ёпилиш вақтида 2013 йилдаги Silk Road майдончиси ҳажмидан 10 карра йирик эди”, - деган ФҚБ директори в.б. Эндрю Маккейб. 

Интернет фойдаланувчилари Tor браузери орқали сайтга кириб, биткоинлар воситасида харидларни амалга оширишган. Унда гиёҳванд моддалар, қурол ва киберҳужумлар учун дастурий таъминотлар сотилган. 

Сешнснинг сўзларига кўра, AlphaBay майдонида 40 минг сотувчи, 200 минг харидор рўйхатдан ўтган. Унда 250 мингдан ортиқ турли товар ва хизматлар сотилган. Хусусан, 238 сотувчи героин таклиф қилинган. 5 июль куни AlphaBay асосчиси ҳисобланган канадалик Александр Казес Таиландда ушланган эди.
 
У бир неча кундан сўнг қамоқхонада ўзини ўлдирди. 

Бундан аввалроқ, июнь ойида шунга ўхшаш яна бир интернет савдо майдони Hansa Market ёпилганди.