Тошкент шаҳар ҳокимининг 2017 йил 28 июлдаги 981–сонли қарорига асосан Ҳосил Ҳусанович Халматов Тошкент шаҳар ҳокимлиги Йўловчи транспортининг барча турлари ҳаракатини лицензиялаш ва мувофиқлаштириш департаменти бошлиғи этиб тайинланди.

Бунга қадар Х.Халматов “Тошшаҳартрансхизмат” АЖ бошқарув раисининг ўринбосари – бош муҳандис лавозимида фаолият олиб борган. 

Х.Халматов 2004 йилдан буён Тадбиркорлар ва ишбилармонлар ҳаракати – Ўзбекистон либерал-демократик партиясининг аъзоси ҳисобланади. 2014 йилдан эса ушбу партиядан Халқ депутатлари Тошкент шаҳар кенгашининг депутатлигига сайланган.

Тошкент шаҳар ҳокимлиги Йўловчи транспортининг барча турлари ҳаракатини лицензиялаш ва мувофиқлаштириш департаментининг асосий вазифалари барча транспорт турлари ҳаракатини мувофиқлаштириш, йўналишлар тармоғини тартибга солиш ва мақбул ҳолга келтириш, шаҳарда йўловчи ташиш бўйича буюртмачи вазифасини бажариш, лицензиялар бериш ҳуқуқига эга бўлган ҳолда йўловчи ташиш йўналишларини қатъий тендер асосида белгилаш, рақобат муҳитини вужудга келтириш ва мулкчилик шаклидан қатъий назар барча йўловчи ташувчилар (“Тошшаҳартрансхизмат” АЖ тизимидаги йўловчи ташувчи корхоналар ва йўловчи ташиш билан шуғулланувчи масъулияти чекланган жамиятлар) учун транспорт хизматлари бозорида тенг шароит яратиш, жамоат транспорти иши натижаси ва самарадорлигини баҳолаш ҳамда бошқалар ҳисобланади.