АҚШ президенти Дональд Трамп ўз маъмуриятида ходимларни ўзгартирганини маълум қилди: у Оқ уй аппарати раҳбари лавозимидан Райнс Прибусни бўшатди ва унинг ўрнига ички хавфсизлик вазири, истеъфодаги генерал Жон Келлини тайинлади.  

“Мен ҳозиргина Жон Келлини Оқ уй аппарати раҳбари этиб тайинлаганимни маълум қилишдан хурсандман. У буюк америкалик ҳисобланади”, деб ёзди Трамп бу ҳақда твиттерда.

Таъкидлаб ўтиш жоизки, яқинда Оқ уйнинг коммуникациялар бўйича директори этиб тайинланган Энтони Скарамуччи журналист билан суҳбатда Прибусни “жин урган шизофреник” деб атаб, унинг ишдан бўшатилишини башорат қилганди. Скарамуччи бу гаплари матбуотга чиқиб кетгандан кейин юзага келган катта можародан кейин “мухбирга ишонганидан” афсусдалигини айтиб, ўз сўзлари учун узр сўраган.