КХДР жанговар каллакнинг атмосфера зич қатламини ёриб ўтиш технологиясини ўзлаштира олди. Бу эса қитъалараро баллистик ракета ишлаб чиқишнинг муҳим қисми ҳисобланади, дея баёнот бермоқда Корея республикаси парламенти мудофаа қўмитаси раҳбари Ким Ён У KBS радиостанциясига берган интервьюда.

Унинг сўзларига кўра, жанубий кореялик ҳарбийлар японияликлар томонидан суратга олинган видеоёзувни диққат билан ўрганиб чиқишган. Унда жанговар каллакнинг атмосфера зич қатламига киришини кўриш мумкин. 

"Ёзувда қулаётган жисм таратаётган ёруғлик ёрқин ва бир хил", - деган Ким Ён У. Унинг фикрича, бу ракетанинг жанговар қисми ўта юқори ҳароратга ва юкланишга бардош берганини, ҳавода парчаланиб ёки ёниб кетмаганини кўрсатади. 

Шу билан бирга, экспертга кўра, Пхеньян ракетанинг аниқлигини бошқаришни ҳам ўрганган. "Шимол томони тасодифан Японияга ракета зарбаси бериш эҳтимолига қарамай, парвозни амалга оширгани унинг парвоз йўналишини ишончли тарзда бошқаришни ўрганганини англатади", - деб қайд этган Ким Ён У. 

Жанубий Корея ҳарбийларининг маълум қилишиларича, жанговар каллак Хоккайдо оролидан 150 км узоқликда Япония иқтисодий ҳудудига қулаган. 

Депутатнинг тахмин қилишича, ҚБРнинг учирилиши, Пхеньяннинг АҚШ билан ўз ракета-ядро дастурива минтақавий хавфсизлик масалаларининг бошқа муаммолари юзасидан мулоқот олиб бориш хоҳишини англатади. Шимолий Корея ракетаси 10 минг кмгача уча олиши мумкин. Бу эса, унинг Вашингтон ва Нью-Йорк каби Америка шаҳарларига зарба бера олиши мумкинлигини кўрсатади.

"Бу нарса Шимоли-шарқий Осиёдаги хавфсизлик билан боғлиқ вазиятни тубдан ўзгартиради", - деган Ким Ён У.