2017 йил ҳисобидан Ойнинг иккинчи бор тутилиши юртимиздан туриб кўринди. Ой сиртига сайёрамизнинг кўланкаси тушиши Тошкент вақти билан соат 20:50 да бошланди. Соат 22:22 дан бошлаб Ернинг тим қора сояси ой сиртини қоплай бошлади. Энг катта фаза соат 23:20 га тўғри келди. Тўлин ой сирти Ернинг кўланкасидан соат 01:50 да чиқиб кетади.

Жорий йилдаги биринчи Ой тутилиши 11 февралда содир бўлган, ўшанда бу ҳодиса юртимизнинг ғарбий ҳудудларидан туриб кузатилган эди. Ўшанда Ернинг сояси эмас, фақатгина кўланкаси Ой сиртига тушган эди.

2018 йилда ҳам 2 марта Ой тутилиши кузатилади. Унинг дастлабкиси 31 январь куни рўй беради ва бу ҳодисани асосан Тинч океани минтақаси тўлиқ кузатади. Ўзбекистондан бу ҳодиса қисман кўринади. Бироқ 27 июлда рўй берадиган иккинчи тутилишнинг энг қизғин палласи Ўзбекистондан бемалол кўриниши билан бирга, Ер сояси Ой сиртини тўлиқ қоплаши билан ҳам кам кузатиладиган қизиқарли табиат ҳодисаси бўлади.