Turkiya mehmonxonalaridagi 500dan ziyod rossiyalik sog‘lig‘i yomonlashganidan shikoyat qildi

"Rospotrebnadzor"ga Turkiyaning kurort shaharlarida dam olayotgan rossiyaliklarning sog‘lig‘i yomonlashgani haqidagi 500dan ortiq shikoyat kelib tushgan. Kasallanganlarning aksariyati - 14 yoshgacha bo‘lgan bolalar, deyiladi idora saytida. 

Bundan avval OAVda Turkiyada Koksaki virusi (enterovirusli infeksiyalarga kiradi) bilan kasallangan sayyohlar soni ortib borayotgani, o‘nlab sayyohlar o‘z safarini muddatidan ilgari to‘xtatishiga to‘g‘ri kelayotgani to‘g‘risidagi xabarlar tarqalgandi. Shu munosabat bilan "Rospotrebnadzor" "qaynoq liniyalar"ni ishga tushirgan edi. 

Turkiya sog‘liqni saqlash vazirligi OAVning mamlakatda Koksaki virusi epidemiyasiga doir xabarlarini rad etgan. 

"Qaynoq liniyalar" orqali "Rospotrebnadzor"ning rasmiy manziliga Turkiyaning kurort shaharlarida salomatligi yomonlashganidan shikoyat qilgan 500dan ziyod kishi murojaat qilgan. Side, Alaniya, Belek, Kemer va boshqa shaharlarda joylashgan mehmonxonalarda kasallik holatlari aniqlangan. Kasallikka chalinganlarning aksariyati - 14 yoshgacha bo‘lgan bolalar", - deyiladi xabarda.