AQShning Afg‘onistondagi qo‘shinlari qo‘mondoni toliblarni qurollarni tashlashga chaqirdi

AQShning Afg‘onistondagi qo‘shinlari qo‘mondoni general Jon Nikolson “Tolibon” radikal harakatini qurollarni tashlashga chaqirdi, deb xabar berdi Washington Post nashri.  

“Qurollarni tashlang va afg‘on jamiyatiga qo‘shiling”, degan qo‘mondon va jangarilar “xalqqa qiyinchilik va azob-uqubatlar yetkazishni to‘xtatishlari lozimligini” qo‘shimcha qilgan.

“Biz vaziyatni siyosiy hal qilishga qat'iy amal qilish niyatidamiz. Bu terrorchi guruhlar g‘alaba qozona olmasliklarini tushunib yetganlari sari, ular uchun eng yaxshi yo‘l tinchlik ekanligini tushunadilar”, deb aytgan Nikolson.

Avvalroq AQSh prezidenti Donald Tramp AQShning Afg‘onistondagi harbiylarining vakolatlari terrorchilarga qarshi kurashish uchun kengaytirilishini ma'lum qilgan. Shuningdek, Tramp bundan buyon AQSh terrorchilarga qarshi operatsiyalarda qatnashayotgan harbiylar soni, umuman harbiy rejalar borasida ma'lumotlar bermasligini aytgan.