18:57 / 20.09.2017
6726

65 mln. so‘mlik bojxona to‘lovlaridan “qochmoqchi” bo‘lganlar fosh etildi

Foto: Buxoro viloyati bojxona boshqarmasi

Buxoro viloyati bojxona boshqarmasi “Olot” chegara bojxona kompleksi xodimlari  tomonidan xorijiy fuqaro S.Mexmet  boshqaruvida Turkiyadan respublikamizga yetib kelgan yuk avtotransport vositasi o‘rnatilgan tartibda bojxona ko‘rigidan o‘tkazilganda, navbatdagi bojxona qoidabuzarligi fosh bo‘ldi. Bu haqda Buxoro viloyati bojxona boshqarmasi axborot xizmati xabar berdi.

Yo‘l-yuk kuzatuv hujjatlariga ko‘ra, Toshkent shahridagi “Perfect Leather Manufacture” MChJ nomiga keltirilayotgan yuklar aslida qiymati 27 ming AQSh dollarini tashkil qiluvchi 21 tonnadan ortiq tovarlar  bo‘lishi lozim edi. 

Ammo, bojxona ko‘rigi davomida konteynerdagi tovarlar bilan yo‘l-yuk kuzatuv hujjatlaridagi ma'lumotlar o‘rtasida tafovut mavjudligi aniqlandi. Sodda qilib aytganda mazkur tovarlar hujjatlardagidan ko‘ra ortiqcha miqdorda ekanligi ma'lum bo‘ldi.

Foto: Buxoro viloyati bojxona boshqarmasi

Hisob-kitoblarga ko‘ra, yo‘l-yuk kuzatuv hujjatlaridan qayd etilmagan ayollar kosmetik mahsulotlarining  umumiy qiymati 140 mln.ortiq so‘mni tashkil qildi. Ulardan davlat byudjyetiga 65 mln. so‘m bojxona to‘lovlari to‘lanishi lozim bo‘lardi. 

Hozirda ushbu tovarlar vaqtincha saqlovga olib qo‘yildi va mazkur holat yuzasidan bojxona tekshiruvlari va surishtiruv harakatlari olib borilmoqda. 

Bu borada raqamlarga murojaat qilsak, 2017  yil davomida  Buxoro viloyati bojxona boshqarmasi xodimlari tomonidan bojxona ko‘rigi davomida 73 ta holatda yuk kuzatuv hujjatlarda ko‘rsatilmagan,  5 mlrd. so‘mlik tovar moddiy boyliklar olib kirilayotganligi aniqlandi.  

Top