IKEA савдо белгиси мамлакатда мажбурий ва беихтиёр меҳнатдан фойдаланиш борасида «тўғри йўналишда ҳаракат» кузатилмаётгани боис, Туркманистонда ишлаб чиқарилган пахтадан фойдаланишга тақиқ жорий этди, дейилади компаниянинг баёнотида.

Илгари IKEA Туркманистонни «оғир» ҳудуд деб атар, лекин аҳолининг меҳнат ҳуқуқлари билан боғлиқ муаммоларини қайд этмаган эди.

2015 йилдан эътиборан IKEA бу мамлакатда пахта саноатида ижобий ўзгаришларини рағбатлантириш бўйича пилот лойиҳа билан иш бошлаган эди. Лойиҳанинг мақсади маҳсулот етказиб беришнинг барча бўғинлари IKEA таъминотчиларининг ахлоқ кодексига тўғри келишини ишлаб чиқиш ва амалиётга жорий этишдан иборат эди.

«Мамлакатда мавжудлигимиз фермерларни аҳолининг меҳнат ҳуқуқлари нечоғлик муҳим эканлигига ўргатиш имконини берди», — дейилади компания баёнотида.

IKEA компаниясидагилар қайд этишича, лойиҳа ўтказилган сўнгги 2 йил мобайнида компания ва четдан таклиф этилган аудиторлар таъминотчилар хулқи кодексига тўғри келишини доимий равишда баҳолаб боришган. Баҳолашлар пахта териш кампанияси вақтида, теримчилар иштирокида ўтказилган ва ҳеч қандай қоидбузарлик аниқланмаган.

Лекин мажбурий ва беихтиёр меҳнатдан фойдаланиш борасида пайдо бўлаётган хабарларга асосланиб, компания Туркманистон билан лойиҳани давом эттирмасликка қарор қилди ва буни «ривожланиш тўғри йўналишда бормаяпти», деб тушунтирди.

«Биз меҳнат шарт-шароитларининг халқаро ва маҳаллий мустақил фуқаролик жамияти ташкилотлари томонидан ўтказиладиган шаффоф мониторингни юксалтириш билан бир қаторда мамлакатнинг бутун пахтачилик соҳасида муносиб меҳнат дастури ривожининг аниқ мисолларини кўрмоқчимиз», — дейилади компания баёнотида.

IKEA ўзининг Туркманистондаги пахтачилик соҳасига таъсир этиш қобилиятини «чекланган» деб баҳолайди. Туркманистонда лойиҳани давом эттиришдан воз кечаётганига қарамасдан, IKEA бу мамлакатдаги тажрибасини муваффақиятли, деб атаган.

Эслатиб ўтамиз, IKEA Ўзбекистонда етиштирилган пахтадан фойдаланишга ҳам тақиқ жорий этган.