Жанубий Корея ҳукумати душанба куни Шимолий Корея банкларининг юқори лавозимли 18 вакилига қарши санкциялар киритиш қарори ҳақида эълон қилди. "Рёнхап" агентлиги шу ҳақида хабар берди. 

Агентликнинг таъкидлашича, гап КХДР ташқарисидаги Хитой, Россия, Ливия каби мамлакатлардаги банклар ҳақида кетмоқда.

"Бу одамлар КХДР банкларининг хориждаги вакиллари бўлиб ишлашган. Улар оммавий қирғин қуролини ишлаб чиқиш учун зарур пулларни олишга алоқадорликда гумон қилинмоқда", - дейди Жанубий Корея ТИВ вакили. 

Бундан ташқари, Япония бош вазири Синдзо Абэ 6 ноябрь куни Шимолий Кореяга қарши қўшимча санкциялар киритиш режаси ҳақида маълум қилди.

"Эртага биз 35 ташкилот ва жисмоний шахс активларининг музлатилишига доир қарор қабул қиламиз", - деди у АҚШ президенти Дональд Трампнинг Японияга ташрифи давомида ўтказилган қўшма матбуот конференцияси давомида. 

Таъкидлаш жоизки, санкциялар КХДРда ядровий қурол ва баллистик ракета ишлаб чиқишга доир дастур устидаги ишлар давом этаётгани туфайли киритилмоқда.