Уларнинг жуда кўпчилиги учун ЖЧ-2018 сўнгги уриниш эди. Тўрт йилликнинг энг нуфузли мусобақасида сўнгги марта иштирок этиш имкониятига эга бўлганлар бундан маҳрум бўлишди. Аммо рўйхатимизда келгусида бу имкониятни қўлга киритиши мумкин бўлганлар ҳам топилади. Tribuna.Uz Россияда бўлиб ўтадиган ЖЧда иштирок этмайдиган юлдузларни санайди.

Пьер-Эмерик Обамеянг, Габон

Фото: Reuters

Дунёнинг энг тезкор футболчиларидан бири бўлган Обамеянинг терма жамоа танлашда омади юришмаган. Пьер Францияда туғилган, шу ерда ўзи учун муносиб бўлган карьера қилган бўлишига қарамасдан, асл ватани Габон терма жамоаси учун тўп суришни истади. Аммо ёлғиз отнинг чанги чиқмас деганларидек, биргина Обамеянг билан терма жамоа бундай мураккаб вазифани уддалаши қийин албатта.

Бу сафарги саралаш босқичида ҳатто Обамеянгнинг ҳам ёрдами сезилмади. Олти учрашувда Пьер-Эмерик бирорта ҳам тўп кирита олмади ва жамоаси ҳақли равишда ЖЧда иштирок этиш ҳуқуқидан маҳрум бўлди.

Арьен Роббен, Нидерландия

Фото: Reuters

Жаҳон чемпионатида иштирок этиш учун энг ҳақли икки футболчидан бири сифатида иккиланмасдан Арьен Роббенни кўрсатиш мумкин. Унинг ёши аллақачон 30лик довондан ошиб бўлди, аммо у ҳамон терма жамоани ортидан эргаштириб юришда давом этаётганди. Афсуски, унинг сўнгги уриниши муваффақиятсиз чиқди. Роббенни Қатардаги ЖЧда тасаввур қилиш — деярли имконсиз. У Нидерландия учун қўлидан келганини қилди, аммо ҳаммаси унинг учун омадсиз тугади.

Ян Облак, Словения

Фото: Reuters

Тақдир ҳазилини қаранг, деярли ўртамиёналар сафига ҳам кирмайдиган Словениядек терма жамоа сафида ҳам анчадан буён топ-футболчилар етишиб чиққан. Айниқса, сўнгги йилларда жамоа бир йўла икки топ-даврозабоннинг пайдо бўлиши эътиборга молик. Яхшиямки, Ян Облак ва Самир Ҳандановичнинг ёши ўртасидаги фарқ етарлича – 9 йил, бу икки футболчи ҳам терма жамоа учун етарлича ўйнай олишидан далолат. Аммо турт йиллик энг нуфузли мусобақасида иштирок этиш учун уларнинг ўзи етарли эмас. «Интер» дарвозабони терма жамоадаги фаолиятини тугатган ва Облак жамоадаги ягона юлдуз бўлиб қолмоқда. Яннинг мўъжизакор ўйинлари туфайли жамоа саралашда атиги 7та гол ўтказиб юборди, бироқ ҳужум чизиғидаги «ўлик» ўйин жамоага ҳеч бўлмаса плей-оффда қатнашиш имконини ҳам бермади.

Марек Ҳамшик, Словакия

Фото: Reuters

Словакия эса айнан ўша гуруҳда иккинчи ўринни эгаллади, аммо очколарнинг умумий кўрсаткичи бўйича ягона омадсиз иккинчи ўрин соҳибига айланиб плей-офф йўлланмасидан қуруқ қолди. Марек Ҳамшик ва Адам Немец саралаш ўйинларида «яйради». Аммо Англия ва Шотландиядан учралган кичик ҳисобдаги мағлубиятлар словакларга 2010 йилдаги натижани такрорлаш имконияти бермади. Катта эҳтимол билан бу Ҳамшикнинг ЖЧда иштирок этиш учун сўнгги имкон эди.

Алексис Санчес, Чили

Агар Буффонни истисно қилсак, «ЖЧ йўлланмасидан энг аламли тарзда қуруқ қолиш» номинациясида шубҳасиз Алексис ғолибликни қўлга киритган бўларди. Колумбия ва Перу учрашувнинг сўнгги дақиқаларида 1:1 ҳисобига келишиб олиши натижасида Санчес ёзда кўпроқ муддат дам оладиган бўлди. Умуман, Хорхе Сампаоли кетгач, терма жамоа ўйинида пасайиш кўзга ташланганди. Бу қисқа вақт ичида ўзининг салбий натижасини ҳам берди.

Эдин Джеко, Босния ва Герцеговина

Фото: Reuters

Терма жамоада яхши шерикларга ёлчимаган яна бир футболчи. Албатта Миролим Пьянич, Сиёд Колашинац каби футболчиар ҳам бор, аммо Босния терма жамоасининг қолган аъзоларини ЖЧ савиясида деб бўлмайди. Ўзининг 31 ёшида ҳам Джеко топ-форвард бўлиб қолмоқда, ҳамон битта ўзи учрашув тақдирини ҳал қилган ўйинлар ҳам бор. Аммо Эдиннинг беш голи ҳам боснияликларнинг гуруҳдан чиқиши учун етарли бўлмади. Джеко – мухлислик қилмаслик қийин бўлган футболчи. У уруш даврида ватанида яшади, яқин дўстларини қабрга қўйди, даҳшатли жойдан оиласини олиб чиқди, терма жамоада эса мусулмон ва проваславларни бир мақсад йўлида бирлаштира олганди. Миллатнинг ҳақиқий қаҳрамони, харизматик футболчи Россияда етишмаслиги аниқ.

Гарет Бэйл, Уэльс

Фото: Reuters

Бэйлнинг дардини биринчи навбатда Райан Гиггз тушуниши шубҳасиз. Бу икки футболчида ҳам Англия терма жамоаси сафида ўйнаш имконияти мавжуд бўлган, аммо улар ўз қалбига қулоқ солган ва Европанинг ўртамиёнасидан ҳам паст бўлган Уэльс терма жамоасида ўйнашни маъқул кўришган. Европа чемпионатида йўлланмалар сонининг оширилиши сабабли Уэльс узоқ тарихиди илк марта йирик мусобақада иштирок этди. Аммо мундиал учун у қадар кўп йўлланма берилмас экан, биз келгусида ҳам Бэйлни ЖЧдан қуруқ қолган омадсизлар қаторига қўшаверамиз.

Давид Алаба, Австрия

Фото: Reuters

Футбол шавқатсиз. Бир мамлакатдан дунёнинг энг яхши қанот ҳимоячиларидан бирини етиштириб чиқариши мумкин. Аммо ўша мамлакатнинг қолган футболчилари ичидан ЖЧга муносиб бўлган ҳеч бўлмаса яна 10 нафар арзирли футболчи етишиб чиқмаслиги мумкин. Давид Алаба худди Бэйл каби омадсизлар рўйхатида, омадсизлар рамзий жамоаларида ҳали узоқ вақт кўриниш бериб турса ҳам керак. Буни кузатиш эса албатта жуда ачинарли.

Марко Верратти, Италия

Фото: Reuters

Италиянинг саралашдаги муваффақиятсизлиги ҳақида ҳали кўп эслашади. 60 йилда илк марта ЖЧ йўлланмасидан қуруқ қолиш – «мовий гвардия» учун ҳақиқий трагедия. Терма жамоада кўпчилик Вентура нимани истаганини ҳалигача тушунмади. Жамоага ютуқ керак бўлиб турганда, таянч яримҳимоячиси бўлган Де Россини туширмоқчи бўлгани, ва футболчининг қаҳрамонлиги тармоқларда кенг тарқалди. Айнан шундай беқарор мураббий натижасида Италия бир қатор юлдузлари, жумладан «ПСЖ» яримҳимоячиси Марко Верратти билан ҳам мундиалсиз қоладиган бўлди. Аммо 25 яшар Верратти учун бу ҳаммаси тугади дегани эмас. Чунки жамоада бошқа футболчилар борки, бу саралаш учун улар учун охиргиси бўлганди.

Леонардо Бонуччи, Италия

Фото: Reuters

Масалан Бонуччи. Бонуччи учун ҳам барчаси тугади дейиш учун вақтли. Келгуси жаҳон чемпионатига қадар у 35 ёшга тўлади. Одатда 35 ёш италиялик ҳимоячилар учун фаолиятининг чўққиси бўлиши ҳам мумкин. Унинг термадаги шериклари Жоржо Кьеллини ва Андреа Бардзальи мисолида ҳам буни кўрдик. Шу маънода «Милан» ҳимоячиси катта эҳтимол билан Қатарга боради, аммо юқорида эсланган икки шерик, терманинг ҳақиқий афсонаси каби  фаолиятини шундай аянчли нуқтада якунлаши аниқ бўлиб улгурди.

Жанлуиджи Буффон, Италия

Фото: Reuters

Ҳақиқий афсона ким деган саволни эса бериб ўтиришимиз шарт эмас. Биз бир муддат мундиал Мессисиз ўтиши мумкинлигини ҳам тасаввур қилиб кўрдик, аммо барчаси Аргентина учун муваффақиятли тугади. Аммо исталган бошқа жамоаларнинг мухлислари учун ҳам ёмон кўриб бўлмайдиган Италия ва Буффонсиз мундиални тасаввур қилиш жуда қийин бўлмоқда. Буффон Швецияга қарши учрашувдан кейинги флеш-интервьюсидаги кўз ёшлари бутун футбол оламининг кўз ёшларига айланиб кетгани рост. У 40 ёшида, мундиал иштирокчиси сифатида фаолиятини тугатмоқчи эди. Аммо барчаси энг ёмон сценарийда тугади.

Бонус
Бундан ташқари Аарон Рэмзи, Жоржо Кьеллини, Миролим Пьянич, Артуро Видаль, Арда Турон, Уэсли Снейдер, Дейли Блинд, Антонио Валенсия, Риёз Маҳрез, Генрих Мхитарян ҳам мундиални томошабинлар қаторида кузатишга маҳкум.

Азамат Муродов тайёрлади