Интернетда сув ичиш учун нутқини икки марта тўхтатишга қарор қилган Дональд Трамп видеоси жадал тарқалмоқда.

15 ноябрда Трамп Осиё давлатлари бўйлаб 12 кунлик турнеси бўйича Оқ уйда журналистлар олдида чиқиши вақтида оғзи қуришиб, энгашганча минбар остидан сув қидира бошлайди.   

Трамп сув тополмай “Уларнинг суви йўқ экан, майли нима ҳам қилардик”, деб нутқини давом эттиради.

Шунда журналистлар унга сув минбар ёнидаги столча устида турганини айтишади. Шундан кейин Трамп бутилкани қўлига олиб, уни очиб, тўғридан-тўғри ундан сув ичишга тушиб кетади.

Бир қарашда ушбу ҳолатда “бироз маданиятсизликдан” бошқа ғайритабиий нарса йўқдек туюлади. Бироқ Трамп сайловолди кампанияси вақтида рақиби, республикачи-сенатор Марко Рубиони бутилкадан сув ичиш учун 2013 йилда телевидение орқали нутқини тўхтатгани учун кескин танқид қилганди.

“Кейинги гал Марко Рубио бутилкадан эмас, стакандан сув ичиши керак – салбий эффект камроқ бўлади”, деб киноя қилган ўшанда Трамп.

Шу сабабли Трампнинг юқоридаги хатти-ҳаракати кенг муҳокама қилина бошланган.

Рубионинг ўзи ҳам бу ҳолатни эътиборсиз қолдирмай, Трампга битта-иккита “маслаҳат бериб қўйди”.

“Ўхшади, бироқ ижро устида бироз ишлаш керак. Буни бир ҳаракат билан ва камерадан кўз узмаган ҳолда амалга ошириш керак. Бироқ биринчи гал учун ёмонмас”, деб кесатган сенатор твиттерда.