Trampning ichish uchun suv qidirayotgan videosi ommalashdi

Internetda suv ichish uchun nutqini ikki marta to‘xtatishga qaror qilgan Donald Tramp videosi jadal tarqalmoqda.

15 noyabrda Tramp Osiyo davlatlari bo‘ylab 12 kunlik turnesi bo‘yicha Oq uyda jurnalistlar oldida chiqishi vaqtida og‘zi qurishib, engashgancha minbar ostidan suv qidira boshlaydi.   

Tramp suv topolmay “Ularning suvi yo‘q ekan, mayli nima ham qilardik”, deb nutqini davom ettiradi.

Shunda jurnalistlar unga suv minbar yonidagi stolcha ustida turganini aytishadi. Shundan keyin Tramp butilkani qo‘liga olib, uni ochib, to‘g‘ridan-to‘g‘ri undan suv ichishga tushib ketadi.

Bir qarashda ushbu holatda “biroz madaniyatsizlikdan” boshqa g‘ayritabiiy narsa yo‘qdek tuyuladi. Biroq Tramp saylovoldi kampaniyasi vaqtida raqibi, respublikachi-senator Marko Rubioni butilkadan suv ichish uchun 2013 yilda televideniye orqali nutqini to‘xtatgani uchun keskin tanqid qilgandi.

“Keyingi gal Marko Rubio butilkadan emas, stakandan suv ichishi kerak – salbiy effekt kamroq bo‘ladi”, deb kinoya qilgan o‘shanda Tramp.

Shu sababli Trampning yuqoridagi xatti-harakati keng muhokama qilina boshlangan.

Rubioning o‘zi ham bu holatni e'tiborsiz qoldirmay, Trampga bitta-ikkita “maslahat berib qo‘ydi”.

“O‘xshadi, biroq ijro ustida biroz ishlash kerak. Buni bir harakat bilan va kameradan ko‘z uzmagan holda amalga oshirish kerak. Biroq birinchi gal uchun yomonmas”, deb kesatgan senator tvitterda.