O‘zbekiston 2025 yilga borib Doing business reytingida kuchli yigirmatalikka kirishi kerak - Mirziyoyev

Bugun, 23 noyabr kuni Seul shahrida davlatimiz rahbari Shavkat Mirziyoyev o‘zining Janubiy Koreyaga davlat tashrifi doirasida Koreya - O‘zbekiston biznes-forumida ishtirok etdi.

Forumda ikki davlatning iqtisodiy va moliyaviy tuzilmalari rahbarlari, yetakchi ishbilarmonlari qatnashishdi.

Uchrashuv boshida Koreya savdo-sanoat palatasi raisi Pak Yong-man Koreya Respublikasi prezidenti Mun Jye-Inning biznes-forum qatnashchilariga tabrik murojaatini o‘qib eshittirdi.

O‘zbekiston Respublikasi prezidenti Shavkat Mirziyoyev o‘z chiqishi avvalida koreyalik hamkasbining forum qatnashchilariga murojaati ikki davlat o‘rtasidagi savdo-iqtisodiy aloqalarning mustahkamlanishida katta ahamiyat kasb etishi va muhim ko‘prik bo‘lib xizmat qilishini qayd etdi.

Prezidentning Koreya Respublikasiga tashrifini yoritish bo‘yicha matbuot markazi «Kun.uz»ga ma'lum qilishicha, O‘zbekiston prezidenti Koreya Respublikasi va O‘zbekiston o‘rtasida turli sohalarda o‘xshashliklar ko‘pligini ta'kidlab o‘tdi. U shuningdek, O‘zbekiston koreys tadbirkorlari uchun keng eshik ochganini aytib o‘tdi. O‘zbekiston prezidenti ayni paytda mamlakatda biznes yuritishni yengillashtirish va xorijiy investitsiyalari himoyalashga yo‘naltirilgan chora-tadbirlar kompleksi amalga oshirilayotganini qayd etib o‘tdi. O‘z chiqishi davomida prezident Mirziyoyev zalda o‘tirgan O‘zbekiston moliya-iqtisodiy idoralari rahbarlariga koreys ishbilarmonlari bilan jips hamkorlikni yo‘lga qo‘yish bo‘yicha muayyan topshiriqlar berdi.

«Mening Koreya Respublikasiga davlat tashrifim aynan sizlar bilan boshlangani bejiz emas. Biz Koreya kompaniyalarning investitsiyalari, ilg‘or texnologiyalari va menejmentini O‘zbekiston iqtisodiyotini rivojlantirish uchun jalb qilishdan manfaatdormiz. Bizda koreys biznesiga taqdim etishga arzigulik narsalar bor», — dedi prezident Mirziyoyev.

«Alohida qayd etib o‘tishim kerakki, bugun biz mamlakatimizga ishonchni mustahkamlash yo‘li bilan investorlarni jalb qilish, uzoq muddatli va oldindan taxmin qilsa bo‘ladigan siyosat, shaffof ishbilarmonlik va investitsion iqlimni shakllantirishga yo‘naltirilgan qat'iy choralarni joriy etmoqdamiz. Bu biz tomonimizdan tasdiqlangan keyingi 5 yilga O‘zbekistonni rivojlantirish Strategiyasining eng ustuvor yo‘nalishlaridan biri hisoblanadi.

Birinchidan, biz shu yilning sentyabridan valuta bozorida kompaniyalar uchun to‘siqlarni butunlay bartaraf etib, milliy valutaning erkin konvertatsiyasini joriy etdik.

Ikkinchidan, biz tashqi savdo siyosatini yanada erkinlashtirish bo‘yicha faol choralar ko‘rishda davom etayapmiz.

Jahon savdo tashkilotiga a'zo bo‘lish borasidagi ishlarni qaytadan boshladik.

Chuqur qoniqish bilan qayt etmog‘im kerakki, ushbu tashrif davomida JSTga a'zo bo‘lish masalalarida hamkorlik qilish uchun qo‘shma «yo‘l xaritasi»ni qabul qilish niyatidamiz.

Koreya biz bunday turdagi hujjat imzolagan ilk davlat bo‘ladi. Bundan tashqari, koreyalik hamkorlar bilan o‘zaro savdoni oshirish shart-sharoitlarini yaxshilash imkoniyatlari ishlab chiqilmoqda.

Uchinchidan, biz xomashyo mahsulotlari va energiya tashuvchi mahsulotlar bozorini erkinlashtirishga kirishdik.

Biz ularning taqsimotiga davlatning to‘g‘ridan-to‘g‘ri aralashuvidan butkul voz kechishga, kelgusi yildan bunday mahsulotlarning birja savdolari orqali shaffof va bozor mexanizmlari asosida savdoga chiqarilishini joriy etishga qaror qildik.

To‘rtinchidan, kichik biznes va ishbilarmonlik sub'yektlariga, shuningdek xorijiy investorlarga soliq yuklamasini kamaytirish ustida tizimli asosda ish olib bormoqdamiz.

Beshinchidan, biznesni himoyalash va unga qulay shart-sharoitlar yaratish maqsadida rejadan tashqari tekshiruvlarning barcha turlari bekor qilinib, nazorat qiluvchi organlarning vakolatlari keskin cheklandi.

Ishbilarmonlar huquqlarini himoya qiluvchi Ombudsman instituti yaratildi.

Alohida qayd etib o‘tishim kerakki, bular biz tomonimizdan amalga oshirilayotgan tizimli islohotlarning faqat kichik bir qismidir va bugungi kunda ular Xalqaro valuta jamg‘armasi, Jahon banki, Osiyo taraqqiyot banki, Yevropa tiklanish va taraqqiyot banki va boshqa xalqaro tuzilmalar tomonidan qo‘llab-quvvatlanmoqda.

Ko‘rilgan zarur choralar sharofati bilan O‘zbekiston ishbilarmonlik muhiti yaxshilanishi dinamikasida yetakchi davlatlar o‘nligiga kirdi. Bir yil ichida mamlakatimiz Jahon bankining «Duing biznes» reytingida 13 pog‘ona yuqoriladi. Biz o‘z oldimizga 2025 yilga borib ushbu reytingda kuchli yigirmatalikka kirishdek ambitsiyali va bemalol amalga oshirsa bo‘ladigan maqsadni qo‘yganmiz», — dedi Seulda o‘tgan Koreya – O‘zbekiston biznes forumida so‘zga chiqqan O‘zbekiston Respublikasi prezidenti Shavkat Mirziyoyev.