Shayx Muhammad Sodiq Muhammad Yusufning “Islom tarixi” kitobining taqdimoti bo‘lib o‘tdi

25 noyabr kuni “Hilol-nashr” nashriyot matbaasida fazilatli shayx Muhammad Sodiq Muhammad Yusuf (rahimahulloh) hazratlarining umrlari oxirlarida yozgan so‘nggi kitoblaridan biri “Islom tarixi” kitobining taqdimoti bo‘lib o‘tdi. Unda O‘zbekiston va xorijdan kelgan ulamolar, mehmonlar, nufuzli diniy tashkilotlar va OAV vakillari ishtirok etdi. Bu haqda tadbirda ishtirok etgan KUN.UZ muxbiri xabar qildi.

Tantanali ravishda tashkil etilgan marosim Qur'on tilovati bilan boshlandi. Shundan so‘ng, “Hilol-nashr” nashriyoti direktori Ismoil Muhammad Sodiq kitobning yozilish va chop etilishi tarixi haqida hikoya qilib berdi. 

“Ustozimiz Shayx hazratlari boshqa ko‘plab asarlari qatorida xalqimizga Islom tarixi haqida ham muxtasar bir kitob taqdim qilishni niyat qilib yurar edilar. Bu borada ulamolar, ahli ilmlar bilan maslahatlar qilib yurardilar. Keyinroq, ba'zi kitoblarni yozish davomida bunday asarning juda zarurligi ma'lum bo‘lgach, bugun taqdim etilayotgan “Islom tarixi” kitobini qisqa muddatda yozib tugatib, nashriyotga topshirdilar. Ammo Alloh taoloning irodasi ekan, bu kitob ustozimiz yakuniga yetkazishga ulgurgan so‘nggi kitoblardan biri bo‘lib qoldi”, - dedi Ismoil Muhammad Sodiq. 

“Alloh taolo ushbu kitobni o‘zbek xalqiga muborak qilsin, barchaga birdek manfaatli, xayrli va barokatli qilsin, muallifdan bu asarni sadaqai joriya o‘laroq qabul aylab, ajru-savoblaridan bahramand aylasin!” – deya o‘z so‘zini yakunladi Ismoil Muhammad Sodiq. 

Mazkur kitobni "Hilol-nashr" nashriyoti kitob do‘konlari va boshqa kitob savdosi bilan shug‘ullanuvchi tadbirkorlik sub'yektlaridan xarid qilishlaringiz mumkin. Quyida ushbu marosimda olingan fotosuratlar bilan tanishish imkoniyatiga egasiz.