Afsonaviy Kapurlar avlodi vakili hayotdan ko‘z yumdi

Afsonaviy hind aktyori Shashi Kapur 79 yoshida hayotdan ko‘z yumdi. Variety nashrining xabar berishicha, u uzoq davom etgan kasallik natijasida vafot etgan. 

Bollivud yulduzi 3 dekabr, yakshanba kuni nafas yo‘llari infeksiyasi bilan Mumbaydagi shifoxonaga joylashtirilgan.

Kapur bolaligidan kinoda rollar ijro etgan. Uning ulg‘aygandagi ilk bosh roli "Taqdir arzandasi" filmida (1961) bo‘ldi.

Shuningdek Shashi Kapur "Daydi" (1951), "Uy sohibi" (1963), "Janob Shekspir" (1965), "Sevgi mavsumi" (1969), "Bombey kinosi" (1970) kabi lentalarda ham suratga tushgan.

Bundan tashqari, Kapur Bollivudning boshqa bir yulduzi - Amitabx Bachchan bilan bir necha filmda birga rol o‘ynagan. Ularning orasida "Devor" (1975), "Sevgi - bu hayot" (1976), "Sodiq xizmatkor" (1982) kabilarni sanab o‘tish mumkin. 

1979 yilda Shashi Kapur artxaus janridagi filmlarga prodyuserlik qila boshladi. Shu bilan birga, u rejissyor sifatida ham faoliyat yuritgan.

Ta'kidlash joizki, Shashi Kapur - Kapurlar sulolasining ikkinchi avlod vakili va kino tarixidagi eng mashhur aktyorlardan biri Raj Kapurning ukasi hisoblanadi.