Афғонистон пойтахти Кобулда портлаш содир этилиши оқибатида 15 киши ҳалок бўлди, 20 киши яраланди. Бу ҳақда Tolo News телеканали хабар берди.  

Портлаш 4 январь маҳаллий вақт билан соат 20:30да шаҳарнинг Баноий туманида, АҚШ элчихонаси яқинида содир этилган. Гувоҳларнинг айтишича, бомбани террорчи-худкуш ҳаракатга келтирган. Телеканалнинг маълум қилишича, теракт оқибатида асосан полициячилар ҳалок бўлган.

Маҳаллий амалдорларнинг маълумотларига кўра, полициячилар бу ҳудудда спиртли ичимликлар ва гиёҳванд моддалар сотилишига қарши операция ўтказишаётган бўлган. Худкуш у томонга полициячилар яқинлашаётганини сезгандан кейин бомбани портлатган.

Ҳозирча ҳеч қайси бир террорчилик гуруҳи ушбу ҳужум учун жавобгарликни ўз зиммасига олмаган. Айни вақтда ҳудуд полициячилар томондан ўраб олинган.