AQSh kongressi Turkiyaga F-35 qiruvchilarini yetkazib berishni to‘xtatdi

AQSh kongressi Anqara Rossiyaning S-400 zenit-raketa majmualarini sotib olmoqchiligi sababli Turkiyaga 5-avloddagi F-35 qiruvchi samolyotlarini yetkazib berishni to‘xtatdi. Bu haqda The Washington Times nashri ma'lum qildi.  

Tegishli tuzatma 2019 yil uchun AQSh mudofaa byudjyetining oxirgi variantiga kiritilib, uni kongressning ikki palatasi tasdiqladi.

F-35’lar taqdiri bo‘yicha yakuniy qaror Pentagon samolyotlarni yetkazib berishning bekor qilinishi oqibatlarini tahlil qilgandan keyin qabul qilinadi.

The Hill nashrining ma'lum qilishicha, Pentagon 90 kun ichida kongressga Turkiyaning F-35 dasturida ishtiroki to‘xtashi Anqara va Vashington o‘rtasidagi munosabatlarga hamda Turkiyaning S-400’ni sotib olish rejalariga qanday ta'sir ko‘rsatishi haqida doklad taqdim qilishi kerak.   

Bundan avvalroq Pentagon rahbari Jim Mettis kongressmenlarni F-35’larni yetkazib berishni taqiqlash g‘oyasidan voz kechishga chaqirgandi.