Foto: Toshkentda yuk poyezdining ikkita vagoni ag‘darilib ketdi

21 sentabr kuni Toshkent shahrining Yashnobod tumanida joylashgan «Oltin tegirmon» yuklash stansiyasida yuk poyezdining ikkita bo‘sh vagoni (g‘alla tashish uchun sisternalar) ag‘darilib ketdi. Bu haqda poytaxt IIBB xabar bermoqda.

Ta'kidlanishicha, ro‘y bergan hodisa natijasida odamlardan hech kim jarohat olmagan.

Biroq, ag‘darilib ketgan vagonlar tufayli to‘siqlar va qisman - temir yo‘l yaqinida joylashgan uylarning qo‘shimcha inshootlari devori vayron bo‘lgan.

«Hozirgi paytda hodisa sodir bo‘lgan joyda O‘zbekiston Respublikasi Ichki ishlar vazirligi transportdagi jamoat xavfsizligini ta'minlash boshqarmasi, Favqulodda vaziyatlar vazirligi, Toshkent shahar hokimligi va IIBB vakillari ishlamoqda. Avariya-tiklash ishlari olib borilmoqda. Voqea sabablari va yetkazilgan zarar miqdori aniqlanmoqda», - deyiladi mahkama xabarida.