Ispaniya politsiyasi 650 kilogramm kokainni musodara qildi

Ispaniya huquqni muhofaza qilish organlari o‘tkazgan operatsiya davomida giyohvandlik vositalari savdosida gumonlangan o‘n bir kishi qo‘lga olindi va 650 kilo kokain musodara qilindi, deb xabar berdi politsiya matbuot xizmati.

Operatsiya Kolumbiya bosh prokuraturasining tergov guruhi va AQSh adliya vazirligining giyohvandlik vositalariga qarshi kurashish boshqarmasi xodimlari bilan hamkorlikda o‘tkazildi.

Tadbir Kolumbiya va AQSh tergov organlari ispaniyalik hamkasblariga Kolumbiyadan Ispaniyaga giyohvandlik vositalari jo‘natilishi rejalashtirilgani haqida xabar qilganidan so‘ng boshlangan. 

Politsiya xodimlari Galisiyada giyohvandlik vositalarini saqlash uchun ombor sifatida foydalanilgan uyni aniqlashga muvaffaq bo‘lishdi.

Madridda besh, Galisiyada olti kishi qo‘lga olindi, 650 kilogramm kokain, 50 ming yevro pul, turli hujjatlar va to‘rtta avtomobil musodara qilingan.