Samarqand va Qoraqalpog‘istonda ikki kishi sovuqdan halok bo‘ldi

Ma'lum bo‘lishicha, 6 dekabr kuni bedarak yo‘qolgani uchun qidiruvga berilgan Qoraqalpog‘iston Respublikasining Xo‘jayli tumani Sarishingul ovulida yashagan, 1991 yilda tug‘ilgan N.R.ning tashqi ko‘rinishidan jarohatsiz jasadi Kulab ovulidan topilgan.

Sud-tibbiy ekspertizasining dastlabki xulosasiga ko‘ra, u «tananing umumiy sovuq qotishi»dan halok bo‘lgan.

Xuddi shunday holat Samarqand viloyatining Paxtachi tumanida ham yuz bergan. Shu yil 17 dekabrdagi ma'lumotga ko‘ra, «Farovon Yo‘ldoshobod» MFY hududida joylashgan «Agrosanoat» MChJga tegishli dala maydonidan Osiyo millatiga mansub, 30–35 yoshlardagi noma'lum erkak kishining tashqi ko‘rinishidan jarohatsiz jasadi topilgan.

Sud-tibbiy ekspertizasi u ham «tananing umumiy sovuq qotishi»dan vafot etganini ko‘rsatgan.

Ko‘rilgan choralar natijasida jasadning shaxsi aniqlangan. U Narpay tumanida yashagan, 1990 yilda tug‘ilgan N.V. ekani ma'lum bo‘lgan.

«Ayni paytda har ikki holat yuzasidan surishtiruv harakatlari olib borilmoqda», – deyiladi xabarda.