Oxirgi 6 yilda O‘zbekiston va Qozog‘iston o‘rtasidagi savdo hajmi qariyb 2,5 barobar oshib, 4,6 milliard dollarni tashkil etdi.
Joriy yilning 22 sentabr kuni O‘zbekiston investitsiyalar, sanoat va savdo vaziri Laziz Qudratov va Qozog‘iston savdo va integratsiya vaziri Arman Shaqqaliyev o‘rtasida muzokaralar bo‘lib o‘tdi.
O‘zbekiston Investitsiyalar, sanoat va savdo vazirligi ma’lumotiga ko‘ra, muloqot chog‘ida tomonlar joriy qo‘shma loyiha va kelishuvlarni amalga oshirish jarayoni, shuningdek, ikki tomonlama savdo-iqtisodiy, transport-logistika va hududlararo hamkorlikni kengaytirish imkoniyatlarini atroflicha ko‘rib chiqdi.
Tomonlar ikki mamlakat o‘rtasidagi savdo hajmi o‘sishining ijobiy dinamikasini qayd etdi. Oxirgi 6 yilda bu ko‘rsatkich qariyb 2,5 barobar oshib, 4,6 milliard dollarni tashkil etdi. Shu nuqtayi nazardan, o‘zaro savdo hajmini yanada oshirish va ko‘lamini kengaytirish yuzasidan vazifalar belgilandi.
Oziq-ovqat, to‘qimachilik, avtomobil, elektr jihozlari, qora metallar, neft-gaz mahsulotlarini yetkazib berish hisobiga savdo ko‘rsatkichlarini yaqin yillarda 10 milliard dollargacha oshirish bo‘yicha qo‘shimcha imkoniyatlar mavjudligi ta’kidlandi. Joriy yilning bahorida tashkil etilgan va o‘tgan oylarda 1,3 million dollarlik mahsulot eksport qilishga muvaffaq bo‘lgan qo‘shma tashqi savdo kompaniyasi bunga hissa qo‘shishiga ishonch bildirildi.
