Argentina prezidenti razvedka xizmatini tarqatib yubordi

Argentina prezidenti Xaver Miley mamlakat Federal razvedka agentligini (Agencia Federal de Inteligencia, AFI) tarqatib yuborishni buyurdi va uning o‘rnida yangi idora tashkil qildi. Bu haqda davlat rahbari ma’muriyati 15 iyul kuni X ijtimoiy tarmog‘ida ma’lum qildi.

Bu qadam tergovning razvedka ichki josuslik, siyosiy va mafkuraviy ta’qiblarda ishtirok etgani haqidagi xulosalari bilan izohlanadi. 

Mileyning farmoniga ko‘ra, 2015 yildan beri mavjud bo‘lgan AFI bevosita prezidentga bo‘ysunadigan, «o‘zgartirish va modernizatsiya qilish uchun» yaratilgan to‘rtta agentlik ustidan nazoratni amalga oshiradigan Davlat razvedka kotibiyati (SIDE) bilan almashtiriladi. 

Gap yangi idoralarni shakllantirish haqida ketmoqda: Argentina razvedka xizmati, «mamlakatga tahdidlarning oldini olish» uchun ma’lumot to‘playdi; Milliy xavfsizlik agentligi, uning vazifasi «jiddiy federal jinoyatlar» hamda jinoiy va terroristik tashkilotlar tahdidlarining oldini olishdan iborat bo‘ladi; IT infratuzilmasini himoya qiluvchi Federal kiberxavfsizlik agentligi; yuqoridagi idoralarni tekshiruvchi Ichki ishlar boshqarmasi.