Sumi viloyati chegara hududlaridan aholining 60 foizi evakuatsiya qilindi

Ukrainaning Rossiya bilan chegaradosh Sumi viloyati aholisining 60 foizdan ortig‘i u yerdan xavfsiz joyga evakuatsiya qilingan. Bu haqda mahalliy viloyat harbiy ma’muriyati rahbari Oleg Grigorov 20 may, seshanba kuni Ukraina televideniyesining Birinchi kanali efirida ma’lum qildi.

Rasmiyga ko‘ra, viloyatdagi 202 ta aholi punktidan evakuatsiya ishlari olib borilmoqda. 86 ming aholining 52 mingdan ortig‘i yoki 60,5 foizi evakuatsiya qilingan. Oxirgi haftaning o‘zida evakuatsiya qilinganlar soni deyarli 2400 kishiga yetdi.

Hozirda Sumi viloyatining 21 mingga yaqin aholisida elektr energiyasi, 10 mingga yaqinida esa gaz yo‘q. Bular, asosan, Rossiya Federatsiyasi bilan chegara yaqinida yashovchi va doimiy ravishda o‘qqa tutilayotganlar, dedi Grigorov.

Uning so‘zlariga ko‘ra, o‘tgan hafta davomida Rossiyaning Sumi viloyatidagi zarbalari natijasida 13 nafar tinch aholi vakili halok bo‘lgan. Eng halokatli hujum davlat chegarasidan 10 km uzoqlikda joylashgan Belopole shahrida mikroavtobusga qarata amalga oshirilgan.