Sidneyda avtomobil Rossiya bosh konsulligi darvozasiga borib urildi

Oq yo‘ltanlamas Rossiyaning Sidneydagi bosh konsulligi darvozasiga borib urilgan. Haydovchi, 39 yoshli erkak qo‘lga olindi.

Foto: ABC

Rossiyaning Sidneydagi bosh konsulligi darvozasiga mashina borib urildi, politsiya voqea sabablarini o‘rganmoqda. Bu haqda 1 sentabr, dushanba kuni erta tongda ABC mediakompaniyasi o‘z saytida xabar berdi.

Qayd etilishicha, mahalliy vaqt bilan taxminan ertalab soat 8 larda Yangi Janubiy Uels politsiyasi shaharning sharqiy qismidagi Rossiya bosh konsulligi binosiga kiraverishda shubhali oq yo‘ltanlamas to‘xtab qolgani haqida xabar olgan. Politsiya xodimlari haydovchi, 39 yoshli erkak bilan gaplashmoqchi bo‘lgan, biroq u go‘yoki darvozadan o‘tib, bosh konsullik hududiga o‘tib ketgan.

Erkak qo‘lga olingan va Surry Hills Police Station politsiya bo‘limiga olib ketilgan. Keyinroq uning mashinasi konsullik hududidan olib chiqilgan. Voqea yuzasidan tergov davom etmoqda. Bunda Avstraliya federal politsiyasi ham ishtirok etmoqda, deyiladi xabarda.

Tayyorlagan: Отабек Матназаров

#konsullik #Sidney #Rossiya