Qashg‘arda Xitoy - Qirg‘iziston - O‘zbekiston - Turkmaniston multimodal marshruti ochildi

Mazkur multimodal marshrutining ochilishi "Markaziy Osiyo – Xitoy", "Xitoy – Yevropa"ga eltuvchi yo‘llarni diversifikatsiya qilish hamda "O‘rta yo‘lak" tranzit imkoniyatlarini rivojlantirishga qaratilgan.

15 oktyabr kuni Qashg‘ar shahridan 7 ta avtomobil ushbu marshrut bo‘yicha harakatni boshladi. Avtomobillar 21 oktyabr kuni O‘zbekistonga va 24 oktyabr kuni Turkmanistonga yetib olishi rejalashtirilgan. Yuklarning bir qismi Turkmanistondan Ozarboyjonga yetkaziladi.

Tadbirda ishtirok etgan Xitoy Transport vazirligi Transport xizmatlari departamenti direktori Tsay Tuanszening aytishicha, "Xitoy-Qirg‘iziston-O‘zbekiston-Turkmaniston" multimodal transport marshruti Markaziy Osiyo mamlakatlari va Xitoy davlat rahbarlarining o‘zaro hamkorlik aloqalarini rivojlantirishga bo‘lgan irodalarining nishonasidir.

Tranzit marshruti barcha ishtirokchi mamlakatlarning iqtisodiy rivojlanishiga, o‘zaro yuk tashuvlar hajmlari o‘sishiga hamda "Bir makon, bir yo‘l" tashabbusining amalga oshishiga ijobiy ta’sir ko‘rsatadi.