Tramp va Si AQSh va XXR o‘rtasidagi kelishmovchiliklarni bartaraf etish niyatida

Tramp Sini “ko‘p yillik do‘st” va “ulkan mamlakatning buyuk yetakchisi” deb atadi. Uning ta’kidlashicha, AQSh va Xitoy o‘rtasida “uzoq muddatli ajoyib munosabatlar” o‘rnatilishiga umid bor.

“Biz ma’lum muhokamalarni o‘tkazamiz. O‘ylaymanki, ko‘p masalalar bo‘yicha allaqachon kelishib olganmiz va hozir yana ko‘proq masalada kelishuvga erishamiz”, — dedi AQSh prezidenti.

Si Jinping esa o‘z navbatida “dunyoning eng yirik ikki iqtisodiyoti o‘rtasida vaqti-vaqti bilan tortishuvlar paydo bo‘lishi tabiiy” ekanini qayd etdi hamda “Xitoy va AQSh hamkor va do‘st bo‘lishi kerak”, dedi. “Men doimo Xitoyning rivojlanishi sizning ‘Amerikani yana buyuk qilish’ g‘oyalaringiz bilan qadamma-qadam boradi, deb ishonaman”, — deya qo‘shimcha qildi Si.

U, shuningdek, yaqin kunlarda AQSh va Xitoy delegatsiyalarining iqtisod va savdo bo‘yicha muzokaralari bo‘lib o‘tganini aytdi. “Asosiy muammolarimiz yechimini topish borasida ular bazaviy konsensusga erishdi”, — dedi XXR raisi.

Si Jinping G‘azo sektoridagi o‘t ochishni to‘xtatish va Tailand hamda Kambodja o‘rtasidagi mojaroni tartibga solishga qo‘shgan hissasi uchun Trampga minnatdorlik izhor etdi. U so‘zining davomida Pekin butun dunyodagi turli mintaqalarda tinchlikka intilishini ta’kidladi.

AQSh va Xitoy rahbarlari jurnalistlar savollariga javob bermadi. Kirish so‘zlaridan so‘ng muzokaralarning yopiq qismi boshlandi.