Bojxona kodeksiga qo‘shimcha bojlar bo‘yicha o‘zgartishlar kiritildi

O‘zbekiston savdo-iqtisodiy munosabatlarida eng ko‘p qulaylik berish rejimi qo‘llanadigan mamlakatlarda ishlab chiqarilgan tovarlarga bojxona bojlari odatiy stavkalar bo‘yicha qo‘llanadi. Bu rejim nazarda tutilmagan davlatlar tovarlari va ishlab chiqarilgan mamlakati aniqlanmagan tovarlarga esa qo‘shimcha bojxona boji joriy etilmoqda.

Foto: Bojxona qo‘mitasi

Yangi qonun bilan Bojxona kodeksiga o‘zgartish va qo‘shimchalar kiritildi. Unga ko‘ra, boj tarifi bilan belgilangan stavkalar miqdoridagi bojxona bojlari tovarni jo‘natuvchi yoki eksport qiluvchi mamlakatdan qat’i nazar, O‘zbekiston savdo-iqtisodiy munosabatlarida eng ko‘p qulaylik berish rejimini qo‘llayotgan mamlakatlarda ishlab chiqarilgan tovarlarga nisbatan qo‘llaniladi.

Shu bilan birga, savdo-iqtisodiy munosabatlarda eңg ko‘p qulaylik berish rejimi nazarda tutilmagan mamlakatlarda ishlab chiqarilgan yoki ishlab chiqarilgan mamlakati aniqlanmagan tovarlarga nisbatan boj tarifidan tashqari qo‘shimcha bojxona boji undiriladi. Uning miqdori quyidagicha belgilab qo‘yildi:

bojxona bojining advalor stavkasi 10 foizgacha bo‘lgan tovarlarga – 5 foiz qo‘shimcha boj;
advalor stavkasi 10 foizdan 20 foizgacha bo‘lgan tovarlarga – 10 foiz qo‘shimcha boj;
advalor stavkasi 20 foizdan 30 foizgacha bo‘lgan tovarlarga – 15 foiz qo‘shimcha boj;
advalor stavkasi 30 foiz va undan yuqori bo‘lgan tovarlarga – 20 foiz qo‘shimcha boj.

Qonunda belgilanishicha, ushbu tartiblar qonun rasmiy e’lon qilingan kunda e’tiboran 3 oy o‘tgach amalga kiritiladi.