Ugam–Chotqoldagi meteostansiya xodimi harbiylar yordamida evakuatsiya qilindi

Joriy yilning 5 yanvar kuni O‘zgidromet rahbariyati Ugam–Chotqol tog‘ tizmasining borish qiyin, murakkab relefga ega hududida joylashgan «Oygaying» yuqori tog‘li meteorologik kuzatuv stansiyasida xizmat olib borayotgan xodim og‘ir ahvolda qolganini ma’lum qildi. Shu munosabat bilan Mudofaa vazirligidan uni Harbiy havo kuchlari yordamida evakuatsiya qilishda ko‘mak so‘ralgan.

Murojaatdan so‘ng Mudofaa vazirligi Harbiy-havo kuchlarining navbatchi qidiruv-qutqaruv vertolyoti jalb qilinib, tungi vaqtda qutqaruv tadbirlari amalga oshirilgan. Natijada meteostansiya xodimi tezkor tarzda evakuatsiya qilinib, Chirchiq shahridagi tibbiyot muassasasiga yetkazilgan.

Ma’lum qilinishicha, shifokorlar tomonidan unga o‘z vaqtida tibbiy yordam ko‘rsatilgan.