Chiqindi qutilarini o‘rnatish bo‘yicha qoidalar: 13 toifa hudud kesimida

Chiqindi qutilarini o‘rnatish bo‘yicha talablar O‘zbekiston prezidentining 2024 yil 4 yanvardagi 5-son farmoni hamda Vazirlar Mahkamasining 2018 yil 2 oktyabrdagi 787-son qaroriga muvofiq belgilangan. Unga ko‘ra, hudud turiga qarab chiqindi qutilarini o‘rnatish masofalari va mas’ul tashkilotlar aniq ko‘rsatilgan.

Agentlik ma’lumotiga ko‘ra, chiqindi qutilarini o‘rnatish tartibi quyidagicha:

• ko‘p kvartirali uylarga — Xususiy uy-joy mulkdorlari shirkatlari yoki boshqaruvchi tashkilotlar tomonidan har bir pod’yezdga kirish yo‘lida 1 tadan;
• tashkilot va savdo obektlariga — yuridik shaxslar, tashkilot va idoralar mulkdorlari yoki ijaraga oluvchilari tomonidan binoga kirish-chiqish yo‘llarida 1–2 tadan;
• bozorlar va yirik savdo majmualariga — bozor ma’muriyati yoki savdo faoliyati bilan shug‘ullanuvchi tadbirkorlik sub’yektlari tomonidan har 250 m² maydon uchun 1 tadan, savdo do‘konlari qatori bo‘ylab esa har 10 metr masofada;
• tibbiyot muassasalarida — muassasani balansda saqlovchi ma’muriyat tomonidan hovli hududining har 700 m² maydonida 1 tadan, asosiy alleyalarda esa har 10 metr masofada;
• metro va yer osti/yer usti o‘tish joylarida — metropoliten davlat unitar korxonasi, tunnellarda esa tuman va shahar obodonlashtirish boshqarmalari tomonidan har bir kirish-chiqish joyida 2 tadan;
• gavjum ko‘chalar va umumiy foydalanish hududlarida — tuman va shahar obodonlashtirish boshqarmalari tomonidan har 50 metrdan, odam kam joylarda esa har 100 metrdan oshmagan masofada;
• jamoat transporti bekatlarida — ularni balansda saqlovchi tashkilotlar tomonidan har bir bekatda 1–2 tadan;
• yo‘lkalar, magistral ko‘chalar piyodalar yo‘lagi bo‘ylab va ko‘priklarda — hokimliklar huzuridagi tuman-shahar boshqarmalari tomonidan serqatnovligidan kelib chiqib, har 50 yoki 100 metrdan oshmagan masofada 1 tadan;
• jamoat yo‘lovchi transporti hamda temiryo‘l bekati hududlarida — balansda saqlovchilar yoki transport tashkilotlari tomonidan har bir bekatda 1–2 tadan;
• vaqtinchalik savdo do‘konlari va ko‘chma shoxobchalarga tutash hududlarda — xo‘jalik yurituvchi sub’yektlar tomonidan 5 metr radiusgacha masofada 1 tadan;
• chekish uchun ajratilgan maxsus joylarda — balansda saqlovchi tashkilotlar tomonidan 1–2 tadan;
• istirohat bog‘lari, xiyobon va alleyalarda — balansda saqlovchi tashkilotlar tomonidan bir-biridan 40 metrdan uzoq bo‘lmagan masofada; maydon katta bo‘lsa, har 800 m² uchun kamida 1 ta quti;
• to‘xtash joylari va plyajlarda — balansda saqlovchi tashkilotlar tomonidan avtoturargohlarga kirishda 1–2 ta; dam olish va plyaj zonalarida esa suv bo‘yidan 15 metr, yashil ekinlardan 3–5 metr uzoqlikda, ya’ni har 800 m² ga 1 tadan ko‘tarish mexanizmli yoki almashtiriladigan chelaklarga ega bo‘lgan ko‘chma chiqindi qutilari o‘rnatilishi shart.

Shuningdek, agentlikka ko‘ra, chiqindi qutilari to‘lishiga qarab muntazam ravishda, ammo sutkada kamida bir marta bo‘shatilib, tozalanishi lozim.