“To‘g‘ridan to‘g‘ri shartnomalar tuzilmagan” – OKMK 200 mln dollarlik tenderlar haqida izoh berdi

Kun.uz xalqaro jurnalistlarning Uyushgan jinoyatchilik va korrupsiya haqida xabar berish loyihasi doirasida o‘rganilgan Olmaliq kon-metallurgiya kombinatining 200 mln dollarlik shubhali tenderlari haqidagi surishtiruvni e’lon qilgandi. OKMK axborot xizmati vaziyatga izoh berdi. 

“Olmaliq kon-metallurgiya kombinati tomonidan ushbu davlat xaridlari shartnomalari bo‘yicha xizmat tekshiruvi o‘tkazildi. Kombinat 2021 yildan buyon belgilangan tartibda barcha davlat xaridlarini maxsus elektron platforma orqali amalga oshiradi. Ya’ni elektron savdolar inson omilisiz bajariladi.

Maqolada qayd etilgan 10 ta import kontraktlarning hammasi tender va tanlov usullarida O‘zbekiston Respublikasi tovar va xomashyo birjasining shaffof va ochiq etender.uzex.uz maxsus elektron portalida e’lon qilinib, ochiq raqobat asosida amalga oshirilgan”, deyiladi kombinat izohida.

Qayd etilishicha, surishtiruvda nomi keltirilgan kompaniyalar bilan to‘g‘ridan to‘g‘ri shartnomalar tuzilmagan. Import bo‘yicha har bir lotda eng arzon narx taklifi avtomatik ravishda g‘olib deb topilgan.

“Tanlov/tender ishtirokchilarida affillanganlik holatlari elektron portal orqali avtomatik tarzda tekshirilgan va affillanganlik holatlari tasdiqlanmagan.

Tanlov/tender g‘oliblari tomonidan tovarlar to‘liq hajmda, shartnomada belgilangan sifat ko‘rsatkichlarida va eng asosiysi – kontraktda ko‘rsatilgan muddatda kombinat omborlariga yetkazib berilgan. Yetkazib berilgan barcha tovarlar nomi, tasnifi, sifati va son ko‘rsatkichlari bo‘yicha kombinat tomonidan tekshirilib, maxsus komissiya ishtirokida qabul qilib olingan.

Ta’kidlash joizki, ushbu shartnomalar kombinat manfaatlariga zarar yetkazmagan va davlat xaridlari jarayonida qonunbuzilish holatlari sodir etilmagan”, deyiladi OKMK rasmiy munosabatida.