Bolalar pornografiyasini tarqatgan shaxslar ushlandi

Huquqni muhofaza qiluvchi organlar Telegram'da bolalar ishtirokidagi pornografik mahsulotlarni tarqatib kelayotgan shaxslarni aniqladi.

Ma’lum bo‘lishicha, Farg‘ona viloyatida 1997 yilda tug‘ilgan shaxs Telegram-kanal administratori sifatida pornografik videolarni pul evaziga tarqatib kelgan. U 2025 yil fevral oyidan buyon tarmoqqa 925 ta turli ko‘rinishdagi bolalar pornografik materiallarini joylashtirgan.

Jizzax viloyati Ichki ishlar boshqarmasi aniqlagan boshqa bir holatda esa, 442 ta foydalanuvchiga ega yopiq Telegram-kanalda turli ko‘rinishdagi 403 ta bolalar pornografik materiallarini tarqatib kelgan shaxs qo‘lga olingan.

IIV Kiberxavfsizlik markazi xabariga ko‘ra, qo‘lga olingan shaxslardan yana biri – 2004 yilda Toshkent viloyatida tug‘ilgan. U Telegram'da 4 ta anonim akkaunt orqali qizlar nomidan 6 ta kanal ochgan va jami 3750 ta pornografik materiallarni joylashtirib, bank kartalari va abonent raqamlardan foydalangan holda kanallarni sotgan.

Yigit, shuningdek, voyaga yetmagan shaxslar tasvirlangan pornografik materiallarni 837 nafar shaxsga sotib, jami 29,2 mln so‘m noqonuniy daromad topgan.

Aniqlangan holatlar yuzasidan Jinoyat kodeksining 130-moddasi 3-qismi bilan jinoyat ishi qo‘zg‘atilib, ayrimlariga qamoq ehtiyot chorasi qo‘llangan.