Termiz va yana 5 hudud “kambag‘allik va ishsizlikdan xoli” bo‘lishi kerak - prezident 

Yig‘ilishda viloyat hokimi va tuman hokimlari oldida joriy yilda investitsiyalarni 3 milliard dollarga, eksportni 1 milliard dollarga yetkazish vazifasi turgani qayd etildi. Shuningdek, hududda kambag‘allikni 2,8 foizga, ishsizlikni 4,5 foizga tushirish muhimligi ta’kidlandi.

Davlat rahbari Termiz shahri, Angor, Denov, Jarqo‘rg‘on, Qiziriq va Muzrabot tumanlarini “kambag‘allik va ishsizlikdan xoli hudud”ga aylantirish zarurligini alohida urg‘uladi.

Ma’lum qilinishicha, so‘nggi to‘qqiz yilda viloyat iqtisodiyotida sanoat ulushi 5 karra o‘sib, 10 foizga yetgan. Biroq bu ko‘rsatkich hali ham kamligi qayd etildi.

Yig‘ilishda hududda 100 million tonna ko‘mir zaxirasi mavjud bo‘lishiga qaramay, yiliga atigi 1 foizi qazib olinayotgani aytildi. Shu munosabat bilan joriy yil Boysundagi “Sanjar”, Oltinsoydagi “Oqsuv”, kelasi yil “Fangart” konlarida ko‘mir qazib olishni boshlash topshirildi.

Shuningdek, Janubiy Afrikaning “Sosol” kompaniyasi ko‘mirdan polipropilen, polietilen va kauchuk ishlab chiqarish loyihalariga qiziqish bildirgani ma’lum qilindi. Sariosiyodagi “Qorakon”, “Jyemsonit”, “Chuqur”, “Bayram-1” konlariga esa xitoylik investorlar 1 milliard dollar kiritishga tayyor ekani qayd etildi.

Umuman, mazkur zaxiralar elektrotexnika, qurilish materiallari, kimyo, metallurgiya va avtomobilsozlik tarmoqlari uchun tayyor xomashyo bazasi ekani ta’kidlanib, konlar atrofida sanoat korxonalarini joylashtirish bo‘yicha hisob-kitob qilib, kamida 200 million dollarlik loyihalarni shakllantirish topshirildi.

Bundan tashqari, Boysundagi “Bezaktop” konida sifati Eron, Turkiya va Italiya bilan raqobatlasha oladigan tabiiy tosh zaxiralari yetarlicha o‘rganilmayotgani qayd etildi. Shu kabi konlarda geologiya ishlarini boshlashga ko‘rsatma berildi.